Нам улууһун коллекционердара балаҕан ыйын 21 күнүгэр, Коллекционер күнэ буоларынан сибээстээн, бу күнү көрсө, куйаар ситимин нөҥүө бөлөх иһигэр коллекцияларын араас темаҕа быыстапка оҥорон, хаартыскаҕа түһэрэн группаҕа болдьоммут бириэмэҕэ ыытан билиһиннэрдилэр.
Бу тэрээһини Граф Биэрэгиттэн 51 сыл ыстаастаах коллекционер Людмила Петрова тэрийэн ыытта. Биэс күн устата болдьоммут чааска коллекциялары анал темаларынан хаартыскаҕа түһэрэн ыытыстылар. Ол курдук, бастакы күн
«Мин коллекциям бастакы экспоната» темаҕа саамай саҕалаабыт экспонаттарын көрдөрдүлэр. Манна 1956 сыллаахха тахсыбыт “Саха тылын орфографическай тылдьытын”, сүүтүктэри, значоктары, иһиттэри мунньалларын уонтан тахса коллекционер көхтөөхтүк көрдөрдө. Иккис күн «Оҕо сааһым умнуллубат кэмэ — оскуола!» темаҕа бөрүөлээх уруучукаттан саҕалаан школьнай формаҕа, үөрэнэр кинигэлэргэ, оскуолатааҕы хаартыскаларга тиийэ мунньалларын, ол историятын арыйар кэпсээннээх ыытыстылар. Дьиэ кэргэн саамай киэн туттар реликвиятын көрдөрөр күн «Көлүөнэттэн көлүөнэҕэ бэриллэр Ытык малбыт!» тема буолла. Коллекционердар дьонноруттан хаалбыт малларын былыргы ыскаабы, суругу, туос иһиттэри, көмүс оҥоһуктары, иистэнэр массыыналары, чорооннору, маллаах иһити – көлүөнэни ситимниир, өбүгэ тыынын харыстыыр күндү малларын ыытыстылар. “Оҕо сааһым оонньуура» быыстапкаҕа бэйэлэрэ, оҕолоро оонньообут сэбиэскэй кэмнээҕи оонньуурдары көрдөрүүгэ таһаардылар. Бүтэһик күн «Сэбиэскэй кэмнээҕи фарфор статуэткалар, сервистэр, вазалар» темаҕа элбэх коллекционер кытынна.
Ити курдук, программа быһыытынан коллекцияларын этиллибит күннэргэ киэһэ 7 чаастан 10 чааска диэри ыытан хардарыта байытыстылар. Кэрэни кэрэхсиир, уруккуну үйэтитэр, историяны эдэр көлүөнэҕэ тиэрдэр дьарыктаах коллекционердар музейтан итэҕэһэ суох экспонаттара – культура, история сорҕото буоларын туоһулаатылар.
Быыстапка түмүгүн тэрийээччи Людмила Петрова бэйэтэ таһаарда, анал бириистэрин олохтуурун билиһиннэрдэ.
“Биэс көрүҥҥэ наһаа үчүгэй коллекциялары көрдүбүт, түмүк таһаарарга сүрдээх уустук эбит, бары да наһаа кыһаллан кытынныгыт, барыгытыгар улахан махталбын тиэрдэбин.
Бастакы күн «Мин коллекциям бастакы экспоната» диэн көрүүгэ Иванова Саргылаана Николаевна туос тууйаһа бириискэ тигистэ. Тууйас туруга, хараллыыта олус үчүгэй эбит, бэлиэ суруктаах, хоһоонноох. Иккис күн «Оҕо сааһым умнуллубат кэмэ — оскуола!» диэн көрүүгэ Степанова Александра Алексеевна, үһүс күн «Көлүөнэттэн көлүөнэҕэ бэриллэр Ытык малбыт!» диэн көрүүгэ Корякина Яна Егоровна бириис туттулар. Яна Корякина Максим Аммосовка анаммыт архыыптан көстүбүт суругу харайа сылдьарын, аймах дьоҥҥо саамай күндү тыыннаах туоһу буоларын билиһиннэрдэ. Төрдүс күн «Оҕо сааһым оонньуура» көрүүгэ Белолюбская Ольга Алампадьевна уонна бэһис күммүт «Сэбиэскэй кэмнээҕи статуэткалар, сервизтэр, вазалар» диэн көрүүгэ Ермолаева Альбина Петровна бириистэргэ тигистилэр.
“Бары кыттааччылар коллекцияларын көрөн астынныбыт, үөрдүбүт! Бары кыттыбыттарга сертификат туттарыллар! Барыгытыгар Барҕа махтал! Өссө да араас хайысхаҕа көрүү буолуо! Барыгытыгар этэҥҥэ буолууну, коллекцияҕыт хаҥыы турдун”, — диир Людмила Васильевна.
Мария Винокурова