Захар Прокопьевич Саввин педагогическай үлэтин 1935 сылтан саҕалаабыта. Ол кэмтэн ыла ыччаты иитэр-үөрэтэр үлэттэн сэрии дьылларыгар эрэ тохтуу сылдьыбыта.
1940 сыллаахха Үөдэйгэ үлэлии сылдьан, Дьокуускайдааҕы пединститут история отделениетыгар үөрэнэ киирбитэ. 1942 сыллаахха Ийэ дойдутун көмүскүү Советскай Армия кэккэтигэр ыҥырыллан Воронежскай фроҥҥа тиийбитэ.
Сэриини түмүктээн, Советскай Армия кэккэтиттэн кини 1946 сыл ыам ыйын 11 күнүгэр демобилизацияламмыта. Бойобуой хорсун быһыыларын иһин кини икки Кыһыл Сулус, биир Аҕа дойду сэриитин II степеннээх уордьаннарынан наҕараадаланан дойдутугар этэҥҥэ эргийбитэ.
Эргийэн кэлээт, үлэ үөһүгэр сылдьыбыта. 1948 сылтан 1950 сыллаахха диэри партия Дьокуускайдааҕы горкомун иккис секретарынан, атын салайар үлэлэргэ сылдьыбыта. 1950 сылтан 1961 сылга диэри Саха АССР Үөрэҕин министринэн үлэлээбитэ.
Итинтэн бэттэх бүгүҥҥэ диэри Дьокуускайдааҕы педучилище директора. Захар Прокопьевич быйыл олунньуга 60 сааһын туолла. Саха АССР Верховнай Советын Президиумун уурааҕынан кини аата үөрэх министерствотын Бочуотун кинигэтигэр киллэриллибитэ.
Норуот үөрэҕириитин туйгуна таб. З.П. Саввиҥҥа 1960 сыллаахха РСФСР үтүөлээх учууталын бочуоттаах аата иҥэриллибитэ. Уһун кэмнээх, сыралаах үлэтин иһин правительство кинини үс төгүллээн «Бочуот Знага»уордьанынан наҕараадалаабыта.
Е. Иванов
«Ленин суола», 1975 с., ыам ыйа