Пятилетка түмүктээһиннээх сылыгар тутааччылар оройуон эмчиттэригэр балыыһа саҥа куорпуһун бэлэхтээтилэр. Таас балыыһа тустаах үлэһиттэргэ уонна эмтэнээччилэргэ киэҥ-куоҥ бэртээхэй усулуобуйаны тэрийдэ.
Саҥа балыыһа символическай күлүүһүн туттарыы Улуу Кыайыы 30 сылын туолар кэмигэр буолбута. Бу бырааһынньыкка оройуон нэһилиэктэрин эмчиттэрэ уонна общественнай тэрилтэлэр бэрэстэбиитэллэрэ кыттыыны ылбыттара.
Урут суруллубатаҕын быһыытынан, кылгастык биэчэр хайдах барбытын билиһиннэриэҕиҥ. Райсовет исполкомун председателэ таб. Попов Н.Е. таас балыыһа үлэҕэ киирбитинэн сибээстээн, тутааччыларга ССКП райкомун уонна райсовет исполкомун Бочуотунай грамоталарын туттарда. Кинилэр ортолоругар бааллар: каменщиктар биригээдэлэрин биригэдьиирэ Григорий Васильев, болуотунньуктар биригээдэлэрин салайааччы Степан Местников, каменщиктар Владимир Акимбетов, Николай Федоров, сантехник Александр Винокуров уо.д.а.
Таас балыыһа символическай күлүүһүн оройуон кылаабынай бырааһыгар И.И. Новгородовка Г. Васильев үөрүүлээх быһыыга-майгыга туттарар.
Тутааччыларга уонна бөдөҥ базаламмыт эмп үлэһиттэригэр инникитин өссө таһаарыылаахтык үлэлээн, дьон-сэргэ махталын ыла туралларыгар баҕаларын биллэрдилэр. Олохтоохтор үөрүүлэрин ССКП обкомун секретара Ю.Н. Прокопьев, Саха АССР Доруобуйа харыстабылын министрэ П.А. Петров уонна ССКП райкомун бастакы секретара В.Е. Колмогоров үллэһиннилэр. Харда этиилэри оройуон кылаабынай бырааһа И.И. Новгородов, эмп үлэтин бэтэрээнэ Н.Г. Корякина, Герой Ийэ М.С. Макарова, комсомольскай тэрилтэ секретара Ю. Осетров оҥордулар. Кинилэр балыыһа саҥа куорпуһугар үлэлээччилэргэ бөдөҥ ситиһиилэри баҕардылар.
Үөрүүлээх биэчэргэ сэрии уонна үлэ бэтэрээннэригэр сыаналаах бэлэхтэр, өйдөбүнньүк суруктар, эмп тэрилтэтин сорох эдэр үлэһиттэригэр ЫБСЛКС обкомун уонна райкомун Эҕэрдэ аадырыстара туттарылыннылар.
Эмп үлэһиттэрэ партия уонна правительство нэһилиэнньэ доруобуйатын харыстааһыҥҥа аҕалыы кыһамньытын иһин махталларын тиэртилэр уонна бэйэлэрин иннилэригэр чопчу соругу туруорунан таһаарылаахтык үлэлииргэ быһаарыннылар.
***
Нам сэлиэнньэтин кэрэ миэстэтигэр таас дьиэ ыраахтан кылбайан көстөрө хайа олохтооҕу үөрбэт-көтүппэт буолуой? Айылҕа күөх симэҕинэн киэргэнэн турара көрүөхтэн кэрэ. Бу саҥа тутуу оройуон историятын страницатыгар киллэриллэригэр саарбаҕалааһын суох.
Билигин ааҕааччыларга оройуон киин балыыһатын туһунан кыратык билиһиннэриэҕи баҕарыллар. Балыыһа бастакы этээһигэр 25 куойкалаах терапевтическай отделение, биохимическай отделлардаах киин лаборатория уонна аптека филиала үлэлиэхтэрэ. Икки этээскэ 25 миэстэлээх оҕо, 11 миэстэлээх дьахтар оҕолонор отделениелара, стоматологическай кабинет үлэлииллэрэ былааннанар. Бэстилиэнэй этээскэ 20 миэстэлээх хирургическай, 5куойкалаах харах отделениелара аһыллыахтара. Итини сэргэ, бу этээскэ физио уонна рентген кабинеттара үлэлиэхтэрэ.
Оройуон киин балыыһата үлэҕэ киириитинэн сибээстээн, эмчиттэр урут үлэлээбит миэстэлэригэр кэҥэтии ыытылынна. Холобур, инфекционнай отделение, оҕо уонна дьахтар консультациялара кэҥэтиллэллэр. Саҥа флюорографическай кабинет үлэҕэ киллэриллэр. Физио уонна процедурнай кабинеттар улаатыннарыллаллар.
Быйыл Эмп үлэһиттэрин күнэ РСФСР, Саха АССР Верховнай, олохтоох Советтарга быыбары кытта түбэһэр. Нэһилиэнньэ доруобуйатын араҥаччылааччылар уонна Кыһыл Кириэс обществотын актыбыыстара тустаах үлэлэригэр өссө дьоһун ситиһиилэнэллэригэр баҕарабыт.
Н. Дьяконов
«Ленин суола», 1975 с., бэс ыйа