Үөдэй нэһилиэгэр халаан уутугар бэлэмнэнии үлэ чэрчитинэн даамбаны бөҕөргөтүү субуотунньуга көхтөөхтүк ыытылынна.
Ол курдук, улуустааҕы култуура уонна духуобунас сайдыытын управлениетын үлэһиттэрэ, “Олимпик” оҕо спортивнай оскуолата, “Якутлесресурс” Намнааҕы филиалын коллектива, Үөдэй нэһилиэгин хоһуун эр дьонноро кыттыыны ыллылар.
Уопсайа субуотунньукка 70-ча киһи күүстээх үлэҕэ турунан, 2000 кэриҥэ кумахтаах куулу бэлэмнээн намыһах сиринэн даамбаны бөҕөргөтөн нэһилиэк олохтоохторугар улахан махталлаах үтүө дьыаланы оҥордулар. Барыта 4 тиэхиникэ үлэлээтэ, трактористар Гаврил Посельский, Трофим Яковлев, Рафаэль Петров, МАУ АРТ директора Эдуард Данилов куулламмыт кумаҕы тиэйдилэр. Нэһилиэк балаҕан дьиэтигэр олохтоох дьаһалта үлэһиттэрэ итии аһынан субуотунньук кыттыылаахтарын күндүлээтилэр.
Инникитин даҕаны, ханнык баҕарар дьыалаҕа, уустук да, үөрүүлээх да түгэннэргэ түмсүүлээх буола туруоҕуҥ диэн баһылык Иван Васильевич күүс-көмө буолбут дьоҥҥо махтанна.
Екатерина Эверстова, Үөдэй
Видео Андрей Ядреев