Партизан нэһилиэгин доруобуйаларынан хааччахтаахтарын түмсүүтүн салайааччыта Саргылаана Неустроева этиитинэн, улууспут инбэлииттэрин түмсүүтэ, салайааччы Марина Литвинова, өйөөн “Аан дойду аанньаллара – Ийэлэр” диэн улуустааҕы тэрээһин нэһилиэк балаҕыныгар, салайааччы Сардана Харысхал, олус сэргэхтик буолла.
Тэрээһин доруобуйаларынан хааччахтаах оҕолоох ийэлэри түмүү, киэҥ араҥаҕа таһаарыы, бэйэ эйгэтигэр сыһыарыы диэн сыаллаах-соруктаах ыытылынна.
Бэлиэ күн ыалдьыттара: Модут, Бөтүҥ, Хатыҥ Арыы, Нам, Хамаҕатта, 1 Хомустаах, Салбаҥ, Үөдэй Партизан нэһилиэктэрэ. Онон балаҕан иһэ тобус-толору мустан, үөрэ-көтө оонньоон сынньаннылар, нэһилиэкпит музейыгар астына-дуоһуйа экскурсиялаатылар. Кэлбит ыалдьыттарбытыгар нэһилиэкпит аҕа баһылыга Борис Романов истиҥ эҕэрдэ тылларын тиэртэ. Тэрээһини нэһилиэкпит дьахтар сэбиэтин председателэ «Дьүрүл» норуодунай ансаамбылын уус-уран салайааччыта Мария Аргунова иилээн — саҕалаан ыытта, улуус “ВОИ” — тан Алтыына Шапошникова.
“Айылгы” оскуолабыт үөрэнээччилэрэ кэлэн эҕэрдэ нүөмэр көрдөрдүлэр. Салайааччыларыгар Саргылана Новгородоваҕа туспа махтал. Итиэннэ, дьэ, саамай күүс-көмө буолбут дьоммутугар «Лебедь» соц. үлэһитигэр Сардана Самсоноваҕа, олохтоох модельнай библиотека салайааччытыгар Ия Степановаҕа махталбытын тиэрдэбит. “ВОИ” салайааччыта Марина Литвинова махтанан, тэрийсибит Мария Аргуноваҕа, Сардана Харысхалга, Ия Степановаҕа махтал суруктары туттарда. Тэрээһиҥҥэ кэлбит ыалдьыттарбыт үөрэн-көтөн, дуоһуйа сынньанан тарҕастылар.
Бары маннык ситимнээхтик үлэлээтэхпитинэ үрдүк ситиһиилээх, үлэ түмүктээх буолар диэн санаанан тэрээһин түмүктэннэ.
Полина Скрябина