Хамаҕатта нэһилиэгэр балаҕан ыйын 17 күнүгэр олус наадалаах көрсүһүү тэрилиннэ. Ол курдук, Аан дойдуга буола турар билиҥҥи балаһыанньаны, АБДь биһиги олохпутугар дьайыытын тула аһаҕас кэпсэтии буолла. Онно “Воин” түмсүү салайааччыта Павел Оконешников, байыаннай дьайыы кыттыылаахтара Хамаҕатта орто оскуолатын выпускнига Петр Абрамов, саха-француз оскуоланы бүтэрбит Николай Соловьев кыттыыны ыллылар.
Бастакынан, билигин И.Е. Винокуров аатынан Хатыҥ Арыы орто оскуолатын дириэктэринэн үлэлии сылдьар Чечня сэриитин кыттыылааҕа Павел Оконешников “Воин” общественнай түмсүү үлэтин, сыалын-соругун, улууска гуманитарнай көмө тэриллиитин, нэһилиэктэр кыттыыларын, ону тиксэрии, Ростов, Новоазовск куораттарга үлэлиир опорнай сулууспаҕа, госпиталларга үлэлэр тустарынан презентация нөҥүө сиһилии билиһиннэрдэ. Бу үлэҕэ “Воин” түмсүү быһаччы оруолун, граннарга кыттыы түмүгэр туох үлэ барбытын сырдатта.
Петр Абрамов (начальник организационного отдела АО “Жатайская судоверфь”) уолаттар тоҕо, туох санааттан баҕа өттүлэринэн контракт баттаһан байыаннай дьайыыга баралларын, оннук сахаларга элбэҕин ис иһигэр киирэн өйдүүр наадатын туһунан санаатын үллэһиннэ. Хас биирдии байыас тус олоҕун сиэртибэлээн да туран быһаарыныы ылынарын сыаналыыр, суох буолбуттар ааттарын билэр, ыччат дьоҥҥо, нэһилиэнньэҕэ сырдатар кэм кэлбитин туһаайан эттэ.
Николай Соловьев (директор ГКУ РС(Я) “Исполнительная дирекция по водному хозяйству и организации восстановительных работ по ликвидации последствий паводков в РС(Я)” Министерства экологии, природопользования и лесного хозяйства РС(Я)), кылаабынайа, ким баҕар Ийэ дойдуну көмүскүүргэ өй-санаа, ис турук, эт-хаан өттүнэн бэлэм буолуохтааҕын тоһоҕолоон бэлиэтээтэ. Хас биирдии бойобуой дьайыы кыттыылаахтарыгар убаастабылы иитиэхтээһин, кинилэр үп-харчы, мэтээл, аат-суол туһуттан буолбакка, эр киһи быһыытынан ытык иэстэрин чиэстээхтик толорбуттарын үрдүктүк тутары, киһи сырдык тыына туохха да тэҥнэспэтин өйдүүр уолдьаспытын эттэ. Аҕа дойду сэриитигэр норуот бүттүүн көмөлөспүтүн курдук, билигин эмиэ хас биирдии киһи, оҕо, үөрэнээччи “Барыта Кыайыы туһугар!” санаанан күннэтэ кылаатын киллэрэ турарыгар болҕомтону ууруоҕуҥ диэн ыҥырда.
Нэһилиэк баһылыга Евгений Ушницкай: “АБДЬ саҕаланыаҕыттан уонтан тахса уолу сүтэрдибит, уонтан тахса уол сэриилэһэ сылдьар. Бүгүн билиҥҥи сэрии кыттыылаахтарыттан, бэйэбит выпускниктарбытыттан, дьиҥ кырдьыгы иһиттибит, биллибит. Көмө акцияларга, хамсааһыннарга салгыы кыттыахпыт. Форма тигиитигэр ылсыһар, БПЛА оҥоруутун саҕалыыр былааннаахпыт”.
Көрсүһүүгэ АБДЬ кыттыылаахтарын төрөппүттэрэ Василий Абрамов, Зоя Осипова, Лена Новгородова тус ыйытыыларын биэрэн хоруй, сүбэ ыллылар, тэрилтэ салайааччылара Юрчана Парникова, Маргарита Федорова санааларын үллэһиннилэр.
Көрсүһүү “Анал байыаннай дьайыы – уопсай дьыалабыт”, салгыы маннык көрсүһүүлэр, аһаҕас кэпсэтиилэр бара турдуннар диэн санаанан түмүктэннэ.
Мария Винокурова