Ленскэй нэһилиэк олохтоох дьаһалтаттан саастарын ситэ илик оҕолор дьыалаларыгар уонна кинилэр бырааптарын көмүскүүр общественнай сэбиэт эппиэттээх сэкирэтээрэ Анна Слепцова, “Берегиня” дьиэ кэргэн киин социальнай педагога Нарыйа Исакова, ПДН инспектора Арина Павлова олунньу 5 күнүгэр учуокка турар 24 дьиэ кэргэҥҥэ сырыттылар.
Өрөспүүбүлүкэ үрдүнэн олунньу 5-7 күннэригэр “Дьиэ кэргэн” диэн ааттаах профилактическай операция биллэриллибит. Операция ис хоһоонунан олохторо сатарыйбыт, ыһыллыбыт дьиэ кэргэттэргэ көмөлөһүү, төрөппүт эбээһинэһин толорботторго өйдөтөр кэпсэтии, профилактическай үлэ ыытыы буолар.
Бу 24 ыалга барыта 55 оҕо хабыллар. Намҥа олорор 24 ыалтан 9-һа атын нэһилиэктэн көһөн кэлбит, 6-та атын улуус олохтоохторо Нам улууһугар кэлэн олохсуйбуттар.
Маннык рейдэлэр кэмнэригэр, хомойуох иһин, ыаллар хаһан баҕарар итирик, эбэтэр холуочук туруктаах көрсүөхтэрин сөп эбит. Күнү-күннээн арыгылыыр ыал туох аһыыр астаах буолуоҕай?! Дьиэлэригэр ас сытын таһааран остуол тула бииргэ олороллоро ахсааннаах буолар. Бу сырыыга ыаллар бары “өйдөөх хааннаах” көрсүбүттэрин Анна Слепцова чопчулуур. Аны туран, сорох ийэ, аҕа аһыы утаҕынан үлүһүйбэт эрээри, оҕолорун соҕотохтуу хаалларар түгэннэрэ эмиэ баар эбит.
“Хас биирдии ыал харчылара суохтар диэҥҥэ киирсибэттэр. Оҕо харчыта ый аайы хамнас курдук түһэр. Холобура, 4 оҕолоох буоллаххына, ыйга уопсайа 100 тыһ. кэриҥэ суума харчы ылаҕын. Ол эрээри, хомойуох иһин, олорор олоппоһо да суох ыаллар бааллар. Ама да буолбутун иһин, бу алта олоппос атыылаһар кыаллыбат дуо?!
Рейдэ кэмигэр сорох төрөппүттэр өрө тардыналларыгар сэрэтии ыллылар. Оҕо хайа да түгэҥҥэ баайын-дуолун туохха да атастаһыа суоҕа: хоһо, оонньуурдара о.д.а. Оҕо бэйэтигэр эрэллээх буоларыгар, дьиэ иһигэр дьол-үөрүү олохтонуохтаах”, – диир Анна Ильинична.
«Эҥсиэли» хаһыат