Биллиилээх государственнай уонна политическай деятель И.Е. Винокуров төрөөбүтэ 130 сылыгар аналлаах, доруобуйаларынан хааччахтаах дьон ортолоругар икки күннээх өрөспүүбүлүкэтээҕи культурнай-спортивнай фестиваль доҕордоһуу оһуохайынан түмүктэннэ.
Фестиваль Илья Егорович төрөөбүт-үөскээбит Хатыҥ Арыы нэһилиэгин Кыһыл Дэриэбинэтигэр «Хатыҥ-Чараҥ» культура уонна сынньалаҥ пааркатыгар олус тыҥааһыннаахтык буолан ааспытын бэлиэтииллэр. Санатан эттэххэ, Алдантан, Тааттаттан, Мэҥэ Хаҥаластан, Горнайтан, Хаҥаластан, Уус Алдантан, Амматтан, Чурапчыттан, Намтан, Дьокуускайтан доруобуйаларыгар хааччахтаах дьон фестивала.
«Илья Егорович саха норуотун өйүгэр-санаатыгар уһулуччулаах политическай деятель, үтүө, амарах сүрэхтээх киһи быһыытынан биллэр. Сэрии уонна сэрии кэнниттэн саамай ыарахан сылларга кини хас биирдии киһи олоҕун уонна туругун иһин үрдүк эппиэтинэһи сүгэн туран, сөптөөх быһаарыылары ылынан саха нацията тыыннаах хааларын турууласпыта. Норуотун хоргуйууттан быыһаабыта, эйэлээх олоҕу туппута уонна хаһан баҕар бэйэтин дьонун ис күүһүгэр, тулууругар бигэтик эрэнэрэ.
Кини үбүлүөйүн чэрчитинэн бу фестивалы ыытыы — Илья Егорович көмүскээбит, турууласпыт сыаннастарыгар улахан ытыктабыл бэлиэтэ буолар. Кини олоҕо биир төһүү күүстээх баҕалаах уонна амарах сүрэхтээх киһиэхэ ханнык баҕарар ыараханы кыайыахха сөбүн көрдөрөр.
Фестивалга мустубут хас биирдии кыттыылаахтар — кыайыылаах суолга тураҕыт. Эһиги күн аайы киһи кыаҕа муҥура суоҕун бэйэҕит холобургутунан дакаастыыгыт. Сыарҕалаах олохпут араас мэһэйдэрин хайдах туоруурга үөрэтэҕит, тулалыыр дьоҥҥо күүс-кыах, эрэл уонна сырдык санааны биллэрэҕит.
Биһиги фестивалбыт — ити судургутук мэтээл иһин күрэхтэһии эрэ буолбатах. Бу — тэҥ кыахтар, доҕордоһуу, бэйэ-бэйэни өйдөһүү уонна айар куту арыйар кэм. Бу — Илья Егорович Винокуров кэс тылын хатылыыр өйдөбүл: бэйэ-бэйэҕэ кыһамньылаах буолуу, чугас дьону өйөөһүн уонна бииргэ иннин хоту хардыылааһын», диэн Бүтүн Россиятааҕы инбэлииттэр обществотын Саха Сиринээҕи салаатын Намнааҕы филиал председателэ Марина Литвинова санаатын үллэһиннэ.
Семен Аргунов