Бүгүн, ахсынньы 5 күнүгэр, Улуу Кыайыы 80, Саха сиригэр Ийэ дойдуну көмүскээччи сылларынан Нам улууһугар доруобуйаларыгар хааччахтаах оҕолорго уонна кинилэр төрөппүттэригэр анаан «Папа, Мама и Я — вместе дружная семья» диэн өрөспүүбүлүкэтээҕи күрэхтэһии буолла.
Тэрээһин сүрүн сыалынан, дьиэ кэргэн сыһыаннаһыыларын культуратыгар угуйуу, доруодуйаларыгар хааччахтаах оҕолору табыгастаах усулуобуйаҕа иитии, чөл олоҕу пропагандалааһын, дьиэ кэргэн үгэстэрин, көлүөнэлэр ситимнэрин бөҕөргөтүү, дойдуга бэриниилээх буолуу тыыҥҥа иитии буолар.
Күрэхтэһии үөрүүлээх аһыллыытыгар «Нам улууһа» МО баһылыгын солбуйааччы Егор Протопопов, улуустааҕы дьиэ кэргэн уонна ыччат политикатын отделын салайааччыта Екатерина Евстафьева, Бүтүн Россиятааҕы инбэлииттэр общественнай тэрилтэлэрин Саха сиринээҕи региональнай тэрилтэтин председателэ Ирина Лебедева, Нам улууһугар адаптивнай спортка специалиһа Людмила Собакина, Намнааҕы социальнай харалта управлениетын сүрүннүүр специалиһа Анастасия Баишева кыттыыны ылан, кыттааччыларга доҕордуу түһүлгэҕэ ситиһиини баҕардылар, наҕараадалары туттардылар.
«Папа, Мама и Я — вместе дружная семья» өрөспүүбүлүкэтээҕи күрэхтэһиигэ Намтан, Чурапчыттан, Хаҥаластан, Дьокуускайтан, Амматтан, Алдантан, Тааттаттан — уопсайа 10 дьиэ кэргэн көхтөөх кыттыыны ылла. 7-тэн 10-гар уонна 11-тэн 14-гэр диэри саастаах оҕолоох хамаандалары икки бөлөххө араардылар. Сүрүн судьуйанан Нам улууһун спортка уонна физическэй культураҕа управлениетын специалиһа Евгений Сивцев үлэлээтэ.
Күрэхтэһээччилэр 7 көрүҥҥэ илин-кэлин түһүстүлэр. Ол курдук, «разминка», «воздужный шар», «кенгуру» «сбор шариков», «бег» эстафеталарга, корнхоллга, ырааҕы ыстаныыга кииристилэр.
Сэттэ көрүҥ түмүгүнэн 7-тэн 10-гар диэри саастаах оҕолоох хамаандаларга: 1 м — Хаҥаластан Изабелла, аҕата Леонид, ийэтэ Ирина Трофимовтар; 2 м — Чурапчыттан Максим, аҕата Денис, ийэтэ Наталья Третьяковтар, 3 м — Намтан Харысхан, убайа Андрей, ийэтэ Сардаана Поповтар буоллулар.
7-тэн 10-гар диэри саастаах оҕолоох хамаандаларга; 1 м — Намтан Артем, аҕата Афанасий, ийэтэ Намияна Матаннановтар, 2 м — Намтан Сайаана, аҕата Евгений, ийэтэ Альбина Дьячковскайдар, 3 м — Хаҥаластан Сандал, убайа Сулустан, ийэтэ Татьяна Матвеевтар таҕыстылар.
Миэстэлэспиттэр сыаналаах бирииһинэн наҕараадаланнылар, көхтөөхтүк кыттыбыттар анал бириистэринэн бэлиэтэннилэр. Доҕордоһуу түһүлгэтиттэн бары үөрэн-көтөн, билсиһэн тарҕастылар.
Семен Аргунов