Биллиилээх государственнай уонна политическай деятель И.Е. Винокуров төрөөбүтэ 130 сылыгар аналлаах, доруобуйаларынан хааччахтаах дьон ортолоругар икки күннээх өрөспүүбүлүкэтээҕи культурнай-спортивнай фестиваль буола турар.
Фестиваль Илья Егорович төрөөбүт-үөскээбит Хатыҥ Арыы нэһилиэгин Кыһыл Дэриэбинэтигэр «Хатыҥ-Чараҥ» культура уонна сынньалаҥ пааркатыгар ыытыллар. Сорох улуустар бэҕэһээ, сорохтор сарсыарда кэлэннэр бүгүн, сарсын түһүлгэлээн олорон күрэхтэһэллэр, культурнай тэрээһиннэргэ кытталлар. Эдэриттэн аҕам саастаахтарыгар тиийэ Алдантан, Тааттаттан, Мэҥэ Хаҥаластан, Горнайтан, Хаҥаластан, Уус Алдантан, Амматтан, Чурапчыттан, Намтан, Дьокуускайтан 220-чэ доруобуйаларыгар хааччахтаах дьон тоҕуоруһа муһунна.
Кыттааччылар сарсыарда саха норуотун чулуу киһитин төрөөбүт дойдутугар, Аппааныга, мустаннар Наммыт улууһун эрэ буолбакка, бүтүн Саха сирин киэн туттуута буолар Илья Егорович Винокуров төрөөбүтэ 130 сыллаах үбүлүөйүгэр анаммыт үөрүүлээх миитиҥ буолла. Доруобуйаларыгар хааччахтаах да буоллар, күүстээх санаалаах, эрэллээх дьоммутун түмэр бэстибээлбит бу улуу киһи сырдык аатыгар ананара дириҥ суолталаах. «Нам улууһа» МО баһылыгын социальнай боппуруоска солбуйааччы Юрий Дьяконов, «Хатыҥ Арыы нэһилиэгэ» ТСТ баһылыга Иван Ноговицын, Бүтүн Россиятааҕы инбэлииттэр обществотын Саха Сиринээҕи салаатын председателэ Ирина Лебедева, Намнааҕы филиал председателэ Марина Литвинова эҥэрдэ тыл эттилэр, И.Е. Винокуров туһунан ахтан-санаан аастылар. Ытыктабыл, үйэлээх махтал уонна сырдык өйдөбүл бэлиэтинэн пааматынньыгар сибэкки дьөрбөтүн уурдулар. Кини аатын сүгэр Хатыҥ Арыытааҕы историяны уонна кыраайы үөрэтэр музейы сэргии көрдүлэр.
Фестиваль үөрүүлээх аһыллыытыгар ыраахтан, чугастан мунньустубут кыттааччылар улуустарынан парадтаан киирдилэр. «Нам улууһа» МО баһылыга Юрий Слепцов уонна тэрийээччилэр эҕэрдэ тыл эттилэр. Инники күөҥҥэ сылдьар, көхтөөх кыттааччыларга бэлиэлэри, махтал суруктары туттардылар.
Бүгүн хабылык уонна хаамыска, кронхол, быа эрийиитэ, дарст саҕаланна. «Вокал» уонна «Танец» айар-тутар куонкурус буолла. Киэһэтин «Доҕордоһуу киэһэтэ» буолуоҕа. Сарсын күрэхтэһиилэр салгыы ытыллыахтара, эбии «городки», остуол онньуулара буолуоҕа.
Фестиваль соруга — инбэлииттэр физическэй, интеллектуальнай уонна духуобунай кыахтарын сайыннарыы, кинилэри социальнай олоххо киллэрии, доруобуйаны чэбдигирдии буолар. Бу тэрээһин инбэлиит дьон айар күүстэрин, спортивнай ситиһиилэрин көрдөрөргө уонна социальнай адаптацияларыгар улахан суолталаах.
Семен Аргунов