От ыйын 1, 2 күннэригэр Хатырыкка Протодьяконов Кузьма Кузьмич тэрийиитинэн, улуус хоту нэһилиэктэрин 65-тэн үөһэ саастаах уонна 72-рин ааспыт кырдьаҕастар мустан араас көрүӈнэргэ күрэхтэһэн бардылар.
Бу күрэхтэһии Максим Аммосов аатынан совхоз 55 сылыгар ананна. Эдэрдии эрчимнээх кырдьаҕастары улуус мунньаҕын бэрэссэдээтэлэ А.И.Винокуров, улуус бэтэрээннэрин сэбиэтин бэрэссэдээтэлэ С.Д. Кобякова, Хатырык нэһилиэгэ тыа сирин түөлбэтин дьаһалтатын баһылыга А.Е.Ноговицын эҕэрдэлээтилэр.
Күрэхтэһээччилэр истэригэр 75-80 саастарын лаппа ааспыт элбэх киһи баара үөрдэр. Спортсменнар 7 көрүӈӈэ күрэхтэһэн кыайыылаахтар грамотанан, мэтээллэринэн бэлиэтэннилэр.
4 көрүӈӈэ муӈутуур кыайыылааҕы быһаарсыыга ох саанан ытыыга эр дьоӈӈо Михаил Борисов бастаан, М. Аммосов совхозка өр сылларга үлэлээбит Татьяна, Василий Ивановтар оҕолоро туруорбут бириистэрин тутта.
Ох саанан ытыыга дьахталларга Оксана Лебедева бастаан Үлэ Кыһыл Знамята уордьаннаах Николай Николаевич Москвитин оҕолоро олохтообут бириистэрин ылла.
Ат сүүрдээһинэ диэн оонньууга эр дьоӈӈо Хатырыктан Василий Захаров бастыӈ жокей буолла.
Эмиэ бу оонньууга дьахталларга мунутуур кыайыылааҕынан Модуттан Мария Шапошникова таҕыста.
Күрэхтэһиибит саамай киэргэлэ эр дьоӈӈо үс көрүӈӈэ (корнхолл, дартс, мээчигинэн сыал быраҕыы) киирсэн муӈутуур кыайыылааҕы быһаарыы буолла. Күрэхтэһэ кэлбит эр дьон бары кыттыыны ылан илин-кэлин түһүстүлэр. Манна Хатырыктан Александр Винокуров, Намтан Дмитрий Попов тэӈ очколаах тахсыбыттарыгар, хаачыстыбатынан Александр Винокуров бастаан сыаналаах бирииһинэн наҕараадаланна. Үһүс көрдөрүүлээх Бөтүӈтэн 86 саастаах Михаил Кугданов тахсан билигин да буорахтааҕын көрдөрдө.
Эрчим Баһыл, Хатырык