Бүгүн, атырдьах ыйын 3 күнүн, сарсыардатыгар өрөспүүбүлүкэ икки улууһугар ыксаллаах быһыы-майгы эрэсиимэ салҕанарын уонна өссө икки улууска уу таһыма үрдүүр түбэлтэтигэр бэлэм олороллорун Саха сирин быыһыыр сулууспата иһитиннэрэр.
Бүлүү өрүс уутун таһыма Сунтаар сэлиэнньэтин аннынан кэлиҥҥи сууккаҕа 1 см түһэн, 236 см тэҥнэстэ (кутталлаах бэлиэтэ – 1 330 см). Барыта 23 олорор дьиэни ааҕан туран, 28 ыал тиэргэнин уу ылла. Өрүс кытыла нэһилиэнньэлээх пуун чэрчитигэр 18 сиринэн сиҥиннэ. Кэмпэндээйи, Туойдаах уонна Бүлүүчээн массыынанан сылдьар суоллара быстан тураллар.
Дьааҥы өрүскэ уу таһыма салгыы түһэр. Верхоянскай куорат уонна Боронук сэлиэнньэтин туһаайыытыларынан уу сууккаҕа 108 см намтаан, 885 см буолла. Верхоянскайга билигин даҕаны 20 тэлгэһэ ууга сытар. Атыттар босхолоннулар. Быстах кэмҥэ олорор пууннарга куоракка 4 киһи, ол иһигэр 1 оҕо уонна Боронукка 9 улахан киһи хааллылар.
Үөһээ Дьааҥы улууһун киинигэр, Баатаҕайга, уу таһыма кутталлаах бэлиэттэн намыһах. Кэлиҥҥи биир суукка иһигэр 11 см түһэн,942 см тэҥнэстэ. Бөһүөлэккэ 3 тэлгэһэни халаан уута ылла. Хайыһардаахха суукка аҥаарыгар уу 6 см эбилиннэ, 5 тиэргэн, ол иһигэр 1 олорор дьиэ уонна оҕо уһуйаанын олбуора, ууга бардылар.
Дулҕалаах үрэх халааныттан Томторго 5 уһаайба, ол иһигэр 3 олорор дьиэлээх уонна амбулатория, хочуолунай, оҕо уһуйаанын уонна норуот айымньытын киинин тэлгэһэлэрэ, бөртөлүөт түһэр былаһаакката эмсэҕэлээтилэр. Ходуһа бүтүннүү ууга тимирдэ.
Индигиир өрүскэ эмиэ уу таһыма намтыы турар. Ол курдук, кэлиҥҥи сууккаҕа Уус Ньара аннынан 68 см, Хонууга 58 см уонна Кэбэргэнэҕэ 8 чаас иһигэр 37 см түспүтүн бэлиэтээтилэр.
Билигин даҕаны быһыы-майгы тыҥааһыннаах. Чуолаан, ардах халаанын уутуттан дьиэлэрэ-уоттара, хаһаайыстыбаннай тутуулара, сэптэрэ-тэриллэрэ, маллара-саллара обургутук эмсэҕэлээбит ыаллар, тэрилтэлэр олус ыарахан балаһыанньаҕа түбэстилэр. Эгэ, сүөһүлээх-сылгылаах хаһаайыстыбалар хаһан уу тардан, ходуһалара кууран, оттууллара-оттооботторо, этэргэ дылы, таҥара илиитигэр киирдэ. Саха сиринээҕи Гидромет сулууспатын билгэтинэн, атырдьах ыйын ортотуттан түһэр уһун ардахтар содулларыгар Дьааҥы, Индигиир өрүстэр иккистээн халаанныыллара сабаҕаланар.
Василий Никифоров
Хаартыска: «Вести Верхоянья»