Нам улууһугар сааскы халаан кутталлаах кэмин устата Саха сирин быыһыыр сулууспатын быыһааччылара, итиэннэ Хабаровскайтан 20 МЧС сотруднига күннэри-түүннэри балаһыанньаны кыраҕытык кэтээтилэр.
Улуус дьаһалтата уонна олохтоохтор кинилэргэ истиҥник махтаннылар. Ол курдук, быыһааччылары барыларын М.К. Аммосов аатынан киин болуоссакка ыҥыран үөрүүлээх быһыыга-майгыга чиэстээтилэр-бочуоттаатылар.
Буолумуна, 2024 сыллаах алдьатыылаах халаан содула умнулла илик. Хоромньу билигин даҕаны ааҕыллар, чөлүгэр түһэриллэр.
Онон сүрэх баастаах дьоҥҥо-сэргэҕэ, кутталлаах кэмҥэ, аттыларыгар кыамталаах спецтехникалаах быыһааччылар дьуһуурустубалыыллара, наада буолла да көмөҕө кэлэр бэлэмнээхтэрэ уоскутар, харысхалы үөскэтэр.
Махтал суруктар СӨ гражданскай оборуонаҕа уонна нэһилиэнньэ олоҕор-дьаһаҕар куттал суоһаабатын хааччыйар министерство салайаччыларыгар, Саха сирин быыһыыр сулууспатыгар, Россия МЧС уорганыгар, быыһааччыларга туттарылыннылар.
Санатар буоллахха, бириэмэтигэр сөптөөх миэрэлэр ылыллан, ол иһигэр 2,6 туонналаах үс төгүл эстэриилэр оҥоһуллан, Алдан Өлүөнэҕэ түһэр кутталлаах балаһыанньата таһаарыллыбата.
Эрдэттэн сэрэтэр үлэлэр ыытыллыбыттарын түмүгэр, улахан кутталы тумуннубут диэн Саха сирин быыһыыр сулууспата суруйда.
Бэйэ информ.
Хаартыска: Саха сирин быыһыыр сулууспата