Алтынньы 14-16 күннэригэр социальнай өҥө тиһигин саҥардыыга аналлаах «Эффективные подходы к социальному обслуживанию» стратегическай семинар-практикум буола турар. Семинары СӨ Үлэ уонна социальнай сайдыы министерствота тэрийэр. Манна министерствоҕа бас бэринэр тутаах тэрилтэлэр салайааччылара, тустаах үлэһиттэр кытталлар.
Алтынньы 15 күнүгэр Нам улууһугар социальнай-геронтологическай киин баазатыгар практическай, уопут атастаһыыта ис хоһоонноох «О повышении качества предоставления социальных услуг в сфере социального обслуживания» диэн темалаах коллегия мунньаҕа буолла. СӨ Үлэ уонна социальнай сайдыы министрэ Елена Волкова, Саха сирин тыыл, үлэ уонна быраабы харыстыыр уорганнарын ветераннарын общественнай тэрилтэтин председателэ Вильям Иванов, «Нам улууһа» МО баһылыга Юрий Слепцов уонна туһааннаах салайааччылар, социальнай өҥөнү оҥорор тэрилтэ директордара кыттыыны ыллылар. Коллегия мунньаҕын кыттыылаахтара Т.К. Ядрихинская аатынан Намнааҕы социальнай-геронтологическай киин үлэтин билистилэр, «Социальнай хааччыйыы өрөспүүбүлүкэтээҕи оҕо специализированнай дьиэтэ» СӨ ГБУ салайааччыта Оксана Гнилевская «Слепая зона» диэн иммерсивнай практикум ыытта.
Коллегия мунньаҕар социальнай өҥө эйгэтигэр социальнай өҥөнү оҥоруу хаачыстыбатын үрдэтии, тэрилтэлэргэ кэлим куттал суох буолуутун хааччыйыы тула кэпсэттилэр. Кырдьаҕастар уонна доруобуйаларыгар хааччахтаах дьон олорор тэрилтэлэригэр кинилэр олохторугар куттал суоһаабатын, усулуобуйа хаачыстыбатын тупсарыыга Намнааҥы социальнай-геронтологическай киин салайааччыта Инна Сивцева, Социальнай хааччыйыы өрөспүүбүлүкэтээҕи оҕо специализированнай дьиэтиг салайааччыта Оксана Гнилевская, Томмоттооҕу кырдьаҕастар уонна инбэлииттэр специализированнай дьиэтин салайааччыта Галина Муханова, дьыаланы салайыы уонна материальнай-техническэй хааччыйыы департаменын салайааччыта Василий Константинов холобур быһыытынан үлэлэрин билиһиннэрдилэр.
СӨ Үлэ уонна социальнай сайдыы министрэ Елена Волкова Т.К. Ядрихинская аатынан Намнааҕы социальнай-геронтологическай киин олохтоохторун көрөр-истэр көмөлөһөөччүтүгэр үтүө суобастаах, таһаарыылаах үлэтин иһин, үлэтигэр бэриниилээҕин сыаналаан Марфа Колпашниковаҕа РФ Үлэ уонна социальнай көмүскэл министерствотын Бочуоттаах грамотатын үөрүүлээх быһыыга-майгыга туттарда.
Бүгүн Дьокуускайга семинар түмүгүнэн төгүрүк остуолга социальнай өйөбүлгэ наадыйар гражданнар олохторун хаачыстыбатын үрдэтэр чопчу быһаарыылары оҥорон ылыныахтара.
Семен Аргунов