Нам улуустааҕы XXVI-с «Аҕа күрэҕэ-2026» күөн көрсүүгэ уопсай түмүккэ Хамаҕаттаттан Харатаала Арыйаан Харыстас уола, Арчылаан кылаан кыайыылааҕынан таҕыстылар. Нам улууһун дьаһалтата олохтообут 50 000 солк. суумалаах Кэрэһэлиир суругунан, Кубогынан, мэтээллэринэн наҕраадаланнылар (11 оч.). Кинилэр ааспыт сыллаахха 2 Хомустаахха кыайыылаах тахсыбыттарын хатылаатылар. Быйыл эбиллибиттэрэ харахха быраҕыллар. Таарыччы аҕыннахха, Харатаала Арчылаан быйыл гирэҕэ уолаттарга Россияҕа чемпионнаан, Саха сирэ өтөрүнэн ылбатах ситиһиитин көрдөрөн барыбытын үөрпүтэ.
2-с үрдэли 1 Хомустаахтан Андрей Андреевич, Валера Винокуровтар ыллылар, Хамаҕатта тыа сирин түөлбэтэ олохтообут 25 000 солк. суумалаах Кэрэһэлиир суругунан, Кубогынан, мэтээллэринэн наҕараадаланнылар (17 оч.). Былырыыҥҥы күрэххэ Харатаалалартан бэрт кыранан сабырыйтаран эмиэ 2 м. ылбыттара.
3-с үрдэлгэ Хатырыктан Алексей Владимирович, Алеша Кутуковтар таҕыстылар уонна Нам улууһун дьаһалтата олохтообут 15 000 солк. суумалаах Кэрэһэлиир суругунан, Кубогынан, мэтээллэринэн наҕараадаланнылар (21 оч.).
«Аҕам саастаах кыттааччы» анал ааты Ленскэй нэһилиэктэн Евгений Николаевич Дьячковскай, оттон «Саамай эдэр кыттааччы» анал ааты Хатыҥ Арыыттан Саша Корякин ылан, сэмэй бэлэхтэринэн бэлиэтэннилэр.
Көрүҥ аайы кыайыылаах, бириистээх миэстэҕэ тиксибит хамаандалар грамоталарынан, мэтээллэринэн, сыаналаах бириистэринэн, сертификаттарынан, нэһилиэктэрин дьаһалталара олохтообут сэмэй бириистэринэн наҕараадаланнылар.
Күрэхтэһиини үрдүк таһымҥа тэрийбит, ыыппыт, судьуйалаабыт тэрилтэлэр салайааччылара Нам улууһун дьаһалтатын дьиэ кэргэҥҥэ, ыччат политикатыгар отделын аатыттан Махтал суруктарынан бэлиэтэннилэр.
Кулун тутар 21-22 күннэригэр Таатта улууһун Чөркөөҕөр ыытыллар XXVI-с өрөспүүбүлүкэтээҕи «Аҕа күрэҕэ-2026» күрэхтэһиигэ Нам улууһун чиэһин Арыйаан Харыстас уола, Арчылаан Харатаалалар көмүскүөхтэрэ. Ситиһиилэри баҕарабыт!
Касьян Олесов-Олук.
ХСФЛ «Lumiere» медиа-бөлөх салайааччыта Мария Алексеева хаартыскалара.