Хомустаах 2-с нэһилиэгэр ыытыллар СӨ нэһилиэктэрин мас тардыһыытын күрэҕэр кыттар хамаандалар мандат хамыыһыйатын аастылар. Эрдэ кытталларын биллэрбит 15-с хамаандаттан үгүстэрэ кэлбэт буолбуттара биллэн, күрэхтэһиигэ барыта 8 хамаанда кыттар буолла: Кэбээйиттэн Чагда, Уус Алдантан Тумул, Кэптэни, Бүлүүттэн Чинэкэ, Горнайтан Бэс Күөл, Томпоттон Кириэс Халдьаайы, Тааттаттан Уолба уонна олохтоохтор, Нам улууһун Хомустаах 2-с нэһилиэгин хамаандалара. Хамаанда 7 киһилээх. Эр дьон 60, 65, 70, 75, 80, 90 кг. диэри уонна 90 кг. үөһэ ыйааһыҥҥа киирсэллэр.
Бу хамаанданан күрэхтэһии 2022 с., 2023 с. кыайыылааҕа Бүлүү Чинэкэтин хамаандатын биир спортсмена мандаты кыайан ааспата — балаһыанньанан өрөспүүбүлүкэтээҕи турнир кыайыылааҕа, призера күрэхтэһиигэ кыттар бырааба суох. Онон лидергэ киирсэр күүстээх хамаанда биир ыйааһыҥҥа киһитэ суох хаалан, хара ааныттан ыарахан балаһыанньаҕа киирдэ. Ол эрээри дьиҥ хартыынаны мас тардыһар помост көрдөрүө.
Бу — төрдүс турнир. Санатан эттэххэ, 2024 с. үһүс хамаанданан киирсиигэ 1м. – Хомустаах 2-с нэһилиэгэ, Нам, 2м. – Чинэкэ, Бүлүү, 3м. – Кэптэни, Уус Алдан, ылбыттара. 2025 сыллаахха бу күрэхтэһиини көҕүлээбит Хомустаах 2-с нэһилиэгин баһылыга Лев Новгородов контрагынан байыаннай дьайыыга сулууспалаан, ити сыл көппүтэ. Быйылгы күрэхтэһии балаһыанньатынан 2,5 тыһ. киһиэхэ диэри ахсааннаах нэһилиэктэр кытталлар. Улуустар кииннэрэ, Дьокуускай куорат эмиэ кыттыыны ылбаттар.
Кылаабынай судьуйанан СӨ үтүөлээх тренерэ, РФ мас-рестлиҥҥэ сүүмэрдэммит хамаандатын кылаабынай тренерэ Николай Элляевич Константинов үлэлиир уонна Дьокуускай куорттан кэлбит судьуйалар биригээдэлэрэ.
Мас тардыһыытыгар ыытыллыбыт сэрэбиэй тугу көрдөрдө?
«А» группаҕа киирдилэр: 1. Чинэкэ, Бүлүү. 2. Томпо, Кириэс Халдьаайы. 3. Кэптэни, Уус Алдан.
«Б» группаҕа: 1. Хомустаах 2-с нэһилиэгэ. 2. Уолба, Таатта. 3. Бэс Күөл, Таатта. 4. Тумул, Уус Алдан.
Муус устар 4-5 күннэригэр помостка тыҥааһыннах киирсиилэр буолуохтара.
Касьян Олесов-Олук.
Видеоҕа Кэптэни хамаандатын бэрэстэбиитэлэ Петр Перевалов.