Алтынньы 23 күнүгэр И.Е. Винокуров аатынан Намнааҕы педколледжка саха талааннаах график-худуоһунньуга Ефим Михайлович Шапошников төрөөбүтэ 100 сылыгар уонна бу үөрэх кыһатыгар баар кини аатын сүгэр хартыына галереята 50 сылыгар анаммыт үөрүүлээх тэрээһин ыытылынна.
Киэн туттар биир дойдулаахпыт, оҕо кинигэтин графикатын саҕалааччыларыттан биирдэстэрэ Е.М. Шапошников айар үлэтин, олоҕун сырдатан эҕэрдэлэрин тиэртилэр: Миролюбива Семенова, Намнааҕы педагогическай колледж дириэктэрин үөрэх чааһыгар солбуйааччы, СӨ үөрэҕириитин туйгуна, педагогическай наука кандидата, үбүлүөйдээх тэрээһин бочуоттаах ыалдьыттара: Туйаара Шапошникова, худуоһунньук кыыһа, Россия худуоһунньуктарын сойууһун чилиэнэ, СӨ искусствотын үтүөлээх деятелэ, АГИКИ преподавателэ, профессор, Ольга Скорикова, Саха сирин худуоһунньуктарын сойууһун бэрэссэдээтэлэ, СӨ культуратын туйгуна, Юрий Дьяконов, Нам улууһун баһылыгын солбуйааччы, Евгений Ушницкай, Хамаҕатта нэһилиэгин баһылыга, улуустааҕы культура управлениетын аатыттан Алексей Афанасьев, З.П. Винокуров аатынан Намнааҕы искусство оскуолатын дириэктэрэ, Мария Игнатьева, улуустааҕы үөрэх управлениетын начальнига.
Кинилэр худуоһунньук нэһилиэстибэтигэр талаанын көрдөрөр оҕо кинигэтин иллюстрацията, станковай графика ураты миэстэни ыларын бэлиэтээтилэр. Ол курдук, Сергей Васильев «Күн Эрили» олоҥхотуттан оҕолорго анаммыт, Иван Гоголев остуоруйаларыгар, Эллэй поэмаларыгар, Суорун Омоллоон, Тимофей Сметанин уо.д.а. айымньыларыгар уруһуйдара – бу кинигэ иллюстрациятын историятыгар “кыһыл көмүс коллекциянан” буоларын, кини уруһуйдара чараас юморынан, баай фантазиянан, уобарастара хомоҕойунан уратылаахтарын санаан аастылар.Нам улууһугар Е.М. Шапошников төрөөбүтэ 100 сылынан элбэх тэрээһин ыытылларын аҕыннылар.
Тыл этээччилэр ыччаты искусство кэрэ эйгэтигэр уһуйар, үөрэтэр үөрэх кыһатыгар, бочуоттаах ыалдьыкка Туйаара Шапошниковаҕа сэмэй бэлэхтэри, махтал суруктары туттардылар. Саха сирин худуоһунньуктарын сойууһун салайааччыта Ольга Скорикова преподавателлэргэ таһаарыылаах үлэни, студеннарга ситиһиилээх үөрэҕи баҕаран хартыына бэлэхтээтэ.
Үөрүүлээх тэрээһиҥҥэ Иннокентий Татаринов ылбаҕай ырыаны ыллаата. Студеннар “Сардаана” муода театрын кыттыылаахтара саха төрүт, аныгы таҥаһын коллекциятын көрдөрдүлэр.
Е.М. Шапошников төрөөбүтэ 100 уонна кини аатын сүгэр хартыына галереятын 50 сылларыгар анаммыт үбүлүөйдээх “Нам сиригэр-уотугар” быыстапка кыһыл лиэнтэтин Миролюбива Семенова, Туйаара Шапошникова, Ольга Скорикова быһа кырыйдылар.
Хартыына галереятын сэбиэдиссэйэ Анна Винокурова быыстапкаҕа талааннаах худуоһунньук нэһилиэстибэтиттэн сэдэх архив матырыйааллара, айымньылара, барыта 100 үлэ уонна үбүлүөйдээх куонкуруска киирбит уруһуйдар турбуттарын сырдатта. Кини “Нам сиригэр-уотугар” графика искусствотыгар анаммыт уруһуй куонкуруһун түмүгүн иһитиннэрдэ. Кыайыылаахтар сэмэй бэлэхтэри, грамоталары туттулар. Мустубуттар быыстапканы сэргии, сэҥээрэ көрдүлэр.
Касьян Олесов-Олук
Ааптар хаартыскалара, видеота
Видео таҥыыта: Роман Шапошников