Алтынньы 24 күнүгэр Эҥсиэлибит килбэйэр киинигэр М.К. Аммосов аатынан култуура уонна духуобунай сайдыы дыбарыаһыгар киһи дууһатын таарыйар, уйадытар, истиҥ киэһэ буолан ааста.
Намнааҕы П.П. Ядрихинскэй-Бэдьээлэ аатынан Олоҥхо дьиэтэ, исписэлиис Сандр Находкин көҕүлээһининэн, Хамаҕатталар биир тарбахха баттанар талааннаах уолбут Иннокентий Третьяков сырдык аатыгар «Ыллам ырыам ылланнын» айар киэһэтин тэрийдилэр. Бу күн Иннокентий урукку уонна кэлин айбыт ырыалара сабыс-саҥа сүрэхтэннилэр, дьоҥҥо-норуокка иһилиннилэр.
Билэрбит курдук, Кеша айар-тутар, ыллыыр, гитаралыыр талаана — удьуоругар. Ийэтэ Февронья Аргунова — мелодистка, аҕата Владимир Третьяков музыкант буолан творческай дьиэ кэргэҥҥэ төрөөбүтэ. Кеша оҕо сааһыттан ырыалыын аргыстаһан, гитаралыын доҕордоһон сырдык эйгэлээх буолан олоҕу, дьону таптыыр сүрдээх эйэҕэс, элэккэй киһи этэ. Ырыалара олус истиҥнэр, дьиҥнээхтэр, уратылар. Хас айбыт ырыатын кыһаллан ийэтиттэн сүбэлэтэрэ-амалатара. Иһиттэххэ кини толоруутугар боростуой курдуктар эрээри, толорорго судургута суохтар. Бииргэ төрөөбүт балта Аурика Федорова эмиэ олус нарын куоластаах ырыаһыт, ырыа айар, үс оҕо күн күбэй ийэтэ.
Иннокентий сыанаҕа таҕыстаҕына зал, сыана сырдыы түһэрэ. Кини толорор ырыатын хас биирдии тылын, матыыбын сүрэҕин ортотунан таһааран, көрөөччүгэ бэлэхтээн утары уунара.
Хомойуох иһин, Киэсэбит тыыннааҕар тахсыбатах «Ыллам ырыам ылланнын» айар киэһэтигэр доҕотторо, аймахтара, бииргэ алтыспыт дьоно этиибитигэр тута сөбүлэһэн кыттан киэргэппиттэригэр, быыс булан бэлэмнэнэн кыттыбыттарыгар тус бэйэм, аймахтар ааттарыттан махтанабын. Маны таһынан, бу кэнсиэр таһымнаахтык ааһарыгар күүс — көмө, өйөбүл буолбут спонсордарбытыгар, ис санааҕытыттан биһигинниин бииргэ буолан кыттыһыыларын, кыһамньыларын иһин махталбыт муҥура суох.
Ырыа-тойук аргыстаах, сырдык өйдөбүллээх киэһэни бэлэхтээбит, долгутуулаах ырыалары оҥорон, толорон иһитиннэрбит хас биирдии нүөмэр кыттыылааҕар махтанабыт уонна өссө да бу ырыалары истиэхпит диэн эрэнэбит.
Ол курдук, кэнсиэргэ кыттыыны ыллылар аҕата Владимир Третьяков бииргэ төрөөбүт быраата Константин Третьяков, бииргэ үөрэммит биир идэлээҕэ, үөлээннээҕэ Марфа уонна Сергей Расторгуевтар ааттарынан Саха өрөспүүбүлүкэтин судаарыстыбаннай циркэтин артыыһа иллюзионист, фокусник СӨ култууратын үтүөлээх артыыһа Дмитрий Колосов, Киэсэ жонглер доҕоро СӨ култууратын туйгуна Пантелеймон Габышев, бииргэ төрөөбүт балта Аурика Федорова иэйэтэ суруйан хаалларбыт ырыатын уонна бэйэтин ырыатын истинник толордо. Кеша армияҕа сулууспалыы сылдьан айбыт ырыатын Олоҥхо дьиэтин уолаттара Валадимир Сыромятников, Руслан Павлов, Сандр Находкин ыллаан кэнсиэри сэргэхтик, тэтимнээхтик саҕалаатылар. Тэҥҥэ үөрэ-көтө үҥкүүлээн ааспыт «Ретро-Данс» народнай үҥкүү коллектива, салайааччы СӨ култууратын үтүөлээх үлэһитэ Любовь Андросова. Бииргэ ыллаабыт, ритм гитараҕа оонньообут «Хамаҕатта» тыыннаах дорҕоон бөлөҕө, салайааччы норуот маастара, СӨ үөрэҕириитин туйгуна Руслан Захаров, солист СӨ култууратын туйгуна Николай Жирков, оҕо саас доҕотторо Дьулус Кононов, оскуола саҕаттан тэҥҥэ ырыа айан, суруйан таһаарбыт атаһа Евгений Колесов, быраата Сандр Находкин-Сандаар «Эдэр Тэтим» төрүт дорҕоонун бөлөҕө, “Күөрэй”, “Үргэл” үҥкүү коллективтара салайааччы Кеша тэҥҥэ «Радуга» оҕо үҥкүү кылааһыгар, кэлин “Ретроҕа” тэҥҥэ үҥкүүлээн ааспыт СӨ култууратын туйгуна Римма Татаринова, «Саҥа Дьыл» ырыатын репертуардарыгар киллэрэн ыллыы сылдьар «Ай-Ыллаа» вокальнай ансаамбыл кыргыттара салайааччы Ирина Винокуроваҕа, урукку бастакы ырыаларыттан биирдэстэрэ «Төлөпүөн» ырыатын дуэт Владимир, Оксана Кудриннар иһитиннэрдилэр, Хамаҕатталар эдэр ырыаһыт уолбут Айсен Васильев, «Айан суола» Хамаҕатта уһун айаҥҥа сылдьар суоппардарыгар анаан айбыт ырыатын Роман Николаев толордо, ыҥырыылаах ыалдьыт СӨ эстрадатын биир чаҕылхай сулуһа биир дойдулаахпыт Кэскил Баишев. Кэнсиэри ыытта быраата Степан Находкин.
Үрдүк сыанаттан үөрүүлээх быһыыга-майгыга кыттыбыт артыыстар кэнсиэр тэрийээччилэриттэн махтал сурук, өйдөбүнньүк бэлэх туттулар. Хамаҕатта тыа сирин түөлбэтин дьаһалтатытын аатыттан Вера Васильевна Колпашникова салайар Олоҥхо дьиэтин үлэһиттэригэр махтал сурук туттардылар. Иннокентий аҕата Владимир Третьяков харда тылы этэн үөрүүтүн үллэһиннэ, махтанан Орто Халыматтан аймахтар ааттарыттан сахалыы тыыннах сэмэй бэлэхтэрин үөрүүлээх быһыыга туттардылар. Кеша учуутала, кылааһын салайааччыта Елена Амбросьева кылааһын оҕолорун кытары тыл этэн, ахтан аастылар.
Түмүктээн эттэххэ, истиҥ иһирэх, дууһаны таарыйар кэнсиэр буолан ааста. Хас биирдии дьоммутугар күндү көрөөччүлэргэ, кыттааччыларга, ыҥырыылаах ыалдьыттарга, сыана кэннинээҕи үлэһиттэргэ, аппаратура, уот-күөс, тыас-уус туруорааччыларга, спонсордарга баҕарабыт доруобуйаны, чэгиэн чэбдик буолууну, күнтэн-күн үөрүүнү, сырдыгы, үтүөнү!
Бары үчүгэйи кытары Оксана Кудрина, 26.10.2026 сыл.