Муус устар 8 күнүгэр Мэҥэ-Хаҥалас улууһун Аллара Бэстээҕэр В.В. Местников аатынан культурнай сайдыы Киинигэр СӨ култууратын Үтүөлээх үлэһитэ, СӨ култууратын Бочуоттаах ветерана, өр сылларга култуура эйгэтин методическай салаатыгар таһаарыылаахтык үлэлээн дириҥ кылаатын киллэрбит Семен Васильевич Хон аатынан «Хоновскай ааҕыылар» Өрөспүүбүлүкэҕэ IV -с төгүлүн методическай, практическай форум киэҥ далааһыннаахтык ыытылынна.
Тэрээһин Саха сиригэр Култуура сылын иитинэн методическай үлэни сайыннарыыга уонна кулууп үлэтигэр практическай ньымалары киллэриигэ үлэлиир култуура идэлээхтэрин түмтэ.
В.В. Местников аатынан культурнай сайдыы Киинин директора Ирина Егоровна Назарова кыттааччыларга тэрилтэ туһунан сырдатта, экскурсияҕа ыҥыран кэпсээн, көрдөрөн билиһиннэрдэ.
300 миэстэлээх көрөөччү саалатыгар киирэн алгысчыт Спиридон Григорьев-Илгэлээх Испирдиэн алгыһын иҥэриннибит, арчыланныбыт, куппут-сүрбүтүн бөҕөргөттүбүт. Ол кэннэ үөрүүлээх тэрээһини Мэҥэ-Хаҥалас улууһун баһылыгын Бастакы солбуйааччыта Гаврил Николаевич Толстяков, Култуураҕа уонна духуобунай сайдыыга салалта начальнига Анна Руслановна Исакова эҕэрдэ тылларынан арыйдылар.
Форум ис хоһооно култуура дьиэлэрин үлэһиттэрин профессиональнай үрдэтиигэ өрөспүүбүлүкэ араас оройуоннарыттан кыттааччылар икки ардыларыгар уопут атастаһыыга, ону тэҥэ күннээҕи практикаҕа туттуллар инновационнай формалары уонна быһаарыылары тарҕатыыга туһуланар. Саха сирин культуратын уонна духуобунай сайдыытын министрэ Афанасий Ноев Форум тиэмэтэ култуура сайдыытыгар ордук суолталааҕын, методическай үлэни күүһүрдэргэ, уопсастыба духуобунай-сиэр-майгы өттүгэр үүнүүгэ, историяҕа, дьиэ кэргэн үгэстэригэр, нэһилиэстибэни ытыктааһыҥҥа тириэрдэрин тоһоҕолоото.
Нам улууһуттан делегацияны култуураҕа уонна духуобунас сайдыытыгар салалтатын начальнига Семен Ядрихинскай салайан илдьэ сырытта. Форум араас секцияларыгар:
— «Обсуждение актуализированного проекта Модельного стандарта деятельности культурно-досуговых учреждений РФ» — Семен Ядрихинскай;
— «Театральные коллективы сегодня: проблемы драматургии и влияние искусственного интеллекта» — А.Ф.Шестаков аатынан УНАДь Народнай театрын режиссера Роман Герасимов;
— «Новый виток развития якутского фольклора» — А.Ф.Шестаков аатынан УНАДь фольклорга специалист Мария Григорьева, уран тыл маастарыстыбатыгар уһуйааччы Вера Куличкина-Цыпандина, Фрунзе нэһилиэгин Е.Г. Охлопков-Буоратай аатынан култуура киинин уус-уран салайааччыта Николай Шапов айар, үөрэтэр, тарҕатар үлэлэрин ньымаларын, улахан дьону, оҕону, ыччаты кытта үлэлэрин хаамыытын билиһиннэрэн кэпсээтилэр.
Улуустааҕы култуураҕа уонна духуобунас сайдыытыгар салалтатын начальнигын солбуйааччыта Александра Новгородова, специалистар Анна Николаева, Сахаяна Орлова, «Алгыс» НАК директора Анна Мылаханова, «Түһүлгэ» НАК директора Антонина Харитонова, А.Ф.Шестаков аатынан УНАДь «Ньургуһун» үҥкүү-хор народнай коллективын балетмейстера Мария Попова, хормейстера Сардана Харитонова, П.П.Ядрихинскай-Бэдьээлэ аатынан Олоҥхо Дьиэтин директора Вера Колпашникова, специалистар Туяра Мегина, Аграфена Винокурова, Владимир Сыромятников, «Чороон» НАК директора Саргылана Пономарева, «Сайдыы» КК салайааччыта Айталина Винокурова, «Самородок» КК салайааччыта Анна Охлопкова үлэ уопутун үллэстиитин көрдүлэр-иһиттилэр.
Семен Васильевич Хон аатынан «Хоновскай ааҕыылар» Өрөспүүбүлүкэҕэ IV -с төгүлүн ыытыллыбыт методическай, практическай форум өрөспүүбүлүкэ култуураларын үлэһиттэрин «Сулустаах киэһэ» улахан кэнсиэринэн түмүктэннэ. Улуустартан, Дьокуускайтан ылбаҕай ырыалаах, үҥкүү кэһиилээх кэлбит биир идэлээхтэрбит ортолоругар Намтан А.Ф.Шестаков аатынан УНАДь «Ньургуһун» үҥкүү-хор народнай коллективын хормейстера Сардана Харитонова кытынна.
Бу курдук, билиини-көрүүнү хаҥатар тэрээһиҥҥэ дьон-сэргэ сынньалаҥын тэрийэр, норуот айымньытын харыстаан, түмэн, тарҕатар идэлээх култуура дьиэлэрин, салалталарын үлэһиттэригэр сылга биирдэ биир түһүлгэҕэ көрсөр түгэн тосхойдо. Култуура кыһаларыгар бииргэ үөрэммиттэр, биир хайысхаҕа айа-тута үлэлии сылдьааччылар бу күн бары үөрэ-көтө, олус истиҥник дуоһуйан сырыттылар. Быйылгы тэрээһиҥҥэ улуустартан, Дьокуускай куораттан 300 тахса киһи бу күҥҥэ сырытта. Маннык хабааннаах тэрээһиннэр биһиэхэ, култуура эйгэтин сайдыытыгар, норуот нэһилиэстибэтин харыстааһыҥҥа үлэлии-хамсыы сылдьар дьоҥҥо олус наадалаах диэн бэлиэтиибит.
Алтыына Шапошникова