Наталья Николаевна Жиркова аатынан Салбаҥ нэһилиэгин түмэлин салайааччыта Дария Афанасьевна Аан дойдутааҕы түмэл күнүнэн «Өбүгэм харысхал мала, дьиэ кэргэн күндүмсүтэр күндү мала» быыстапканы тэрийдэ, экспонаттар тустарынан сиһилии кэпсээтэ.
Ол курдук, Салбаҥҥа оскуоланы маҥнай тэрийбит И.Г. Протопопов — Суруксут Уйбаан чэрэниилэ угардаах мас дипломата, Александра Егоровна ийэтин 19-с үйэтээҕи хаппахтаах чабычаҕа, Салбаҥтан төрүттээх норуот маастара Акулина Леонтьевна Аргунова туос иһиттэрэ, Степанида Ивановна Ядрихинская балетката, Мария Романовна Сэбиэскэй Сойуус гимнасткаларын хаартыскаларын мунньан, кичэйэн килиэйдээбит альбома, ханнык уус оҥорбута биллибэт, културхай быһыылаах атахтаах, онто күөрчэх дуу, күн дуу, сибэкки дуу киэргэтиилээх (туох буолара, суолталааҕа мөккүөрү тарта) икки төгүрүк остуол уо.д.а. сылдьыбыт дьон интэриэһин тарта.
Ити курдук, хас ыал ахсын дьоно тутта сылдьыбыт мала кичэллээхтик уурулла сылдьарын, күндүтүк көрүллэрин, кэлин туспа история буоларын көрдүбүт.
Пионерия күнүгэр дьон хото сырытта. Пионерскай оҕо саас ураты бэлиэтин — кыһыл хаалтыһы баанан, Ленин төбөлөөх значогу түөскэ анньынан ааспыт кэми ахтан-санаан ааһар, урукку альбомнары арыйталаан көрөр үчүгэйин эриэхсит!
Татьяна Касьянова