Бүгүн, кулун тутар 15 күнүгэр, Хатыҥ-Арыы нэһилиэгэ биир киэн туттар киһибит Николай Семенович Гаврильев 105 сылын туолла.
Николай Семенович Аҕа дойду сэриитин кыттыылааҕа, «Үлэ Кыһыл Знамята» уордьан кавалера, Саха Республикатын «Гражданскай килбиэн», Нам улууһа, Хатыҥ-Арыы нэһилиэк МТ «Ытык Киһи» бэлиэ хаһаайына, «Ленин суола» хаһыат аан маҥнайгы «Бастыҥ корреспондент» анал аатын 1988 сыллаахха ылбыта.
И.Е.Винокуров аатынан историяны уонна кыраайы үөрэтэр түмэлгэ Николай Семенович биэрбит матырыйаалларыгар олоҕуран элбэх стендэ оҥоһуллубута, брошюра, киниигэ таҕыста.
2011 сыллаахха Николай Семенович хомуйбут матырыйаалынан 2000 экземплярдаах «Хатыҥ-Арыы нэһилиэгэ» киниигэ 479 стр. Дьокуускай куоракка бэчээттэнэн күн сирин көрбүтэ. Манна ааптар Николай Семенович бэйэтэ, редколлегияҕа кыыһа Екатерина Николаевна Гаврильева, Сардаана Игнатьевна Эверстова буолбуттара. Бу кинигэ билигин нэһилиэкпит хас биирдии библиотекатыгар, тэрилтэҕэ, ыалга биир саамай наадалаах, туһалаах кинигэтинэн буолар.
Быйыл үбүлүөйдээх сылыгар «Хатыҥ-Арыы нэһилиэгэ» киниигэ иккис туома бэчээккэ тахсарыгар нэһилиэк дьаһалтата анал хамыыһыйа тэрийэн үлэ бара турар. Хамыыһыйаҕа Николай Гаврильев кыыһа Харитина Николаевна тэҥҥэ үлэлэһэ сылдьар.
Николай Семеновичка аналлаах бу сылга араас тэрээһиннэр, кылаас чаастара, бэсиэдэлэр, викториналар ыытыллыахтара. И.Е.Винокуров аатынан историяны уонна кыраайы үөрэтэр түмэлгэ Николай Гаврильевка аналлаах стендэ саҥардыллан туруоҕа.
Бастыҥ краевед, историк, художественнай самодеятельность актыыбынай кыттыылааҕа, общественнай корреспондент Николай Семенович Гаврильев үйэлэргэ үтүө аата ааттана туруоҕа.
Надежда Сивцева