Бөтүҥ нэһилиэгэр от ыйын 11 күнүгэр дьоро тэрээһин буолан ааста. Ол курдук, киэн туттар биир дойдулаахпыт, М.К. Аммосов аатынан ХИФУ математикаҕа профессора, физико-математическай наука кандидата, РФ ВПО бочуоттаах үлэһитэ, СӨ, ХИФУ үөрэҕин Бочуоттаах бэтэрээнэ, Д.П. Коркин аатынан Государственнай бириэмийэ лауреата, улууспут, нэһилиэкпит Ытык киһитэ, спорт бэтэрээнэ Николай Кириллович Алексеев аатынан спорт уораҕайын иннигэр, үтүө киһи аатын үйэтитэр өйдөбүнньүк бюст аһыллыытын үөрүүлээх тэрээһинэ буолан ааста.
Николай Кириллович Алексеев (Матбор) сүрүн үлэтин таһынан олоҕун дойдубут спорда сайдарын туһугар анаабыта. Кини көҥүл тустууга ССРС спордун маастара, САССР үтүөлээх тренерэ, И. Поддубнай Кубогын хаһаайына, көҥүл тустуу, слада, самбо көрүҥнэригэр маастардар ортолоругар Россия, Аан дойду чемпионаттарын кыайыылааҕа, призера. Кини тренер быһыытынан үгүс спорт маастардарын, спорт маастарыгар канддидаттары бэлэмнээбитэ. Нам улууһугар 1993 сыллаахтан Н.К. Алексеев бирииһигэр, бэйэтин көҕүлээһининэн, оҕолорго көҥүл тустууга республиканскай турнир ыытыллар. Бу турнирдартан бастакы кыайыыларын ситиһэн улахан спортка тахсыбыттара Леонид Спиридонов, Александр Контоев, Осип Михайлов уо.д.а.
Бэлиэ тэрээһиҥҥэ ыраахтан чугастан ыҥырыылаах ыалдьыттар, хаан-уруу аймахтара, нэһилиэк олохтоохторо уонна Борис Прокопьевич Егоров директордаах Петр Юмшанов аатынан Намнааҕы оҕо спортивнай оскуолатын сайыҥҥы лааҕырын иитиллээччилэрэ тоҕуоруһа муһуннулар.
Мустубут дьоҥҥо бэйэлэрин эҕэрдэ тылларын тиэртилэр: Бөтүҥ нэһилиэгэ тыа сирин түөлбэтин дьаһалтатын баһылыга Михаил Макаров, “Нам улууһа” муниципальнай оройуон баһылыгын тыа хаһаайыстыбатыгар солбуйааччы Филипп Николаев, кини бииргэ төрөөбүт быраата, Нам улууһун ытык киһитэ Владимир Алексеев, Нам улууһун, Бөтүҥ нэһилиэгин Ытык киһитэ Валериан Емельянов, Бөтүҥ нэһилиэгин бочуоттаах олохтооҕо Михаил Кугданов уо.д.а. Кинилэр Николай Кириллович Алексеев аатын сүгэр спортсаала иннигэр бюст туруоруллубута эдэр көлүөнэ биллиилээх спортсмен олоҕун туһунан билэригэр олук буоларын, кини үтүө холобурун утумнаан үгүс ситиһиилээх спорстменнар тахсалларыгар баҕа санааларын тиэртилэр, эрэнэллэрин биллэрдилэр.
Николай Кириллович сырдык аатыгар анаммыт бюст аһыллыбытын туоһулаан, дохсун ытыс тыаһын ортотугар аалай лиэнтэни нэһилиэк баһылыга Михаил Макаров, улуус баһылыгын тыа хаһаайыстыбатыгар солбуйааччы Филипп Николаев, бииргэ төрөөбүт быраата Владимир Алексеев быстылар, мустубут дьон сибэкки дьөрбөтүн уурдулар. Бюһу биллэр скульптор Николай Огонеров чочуйан оҥорбут.
Тэрээһин уопсай хаартыскаҕа түһүүнэн түмүктэннэ. Өссө да үйэлэргэ Николай Кириллович үтүө аата ааттана туруо, кинини утумнуур ыччат аатын үйэтитэн спорка үрдүк чыпчаалларга тахсыахтара диэн эрэнэбит.
Валентина Колесова, Бөтүҥ