Анна Григорьевна Аргунованы Нам улууһун үрдүнэн дьахтар-суоппардартан биир бастакылара буоларын билэбит. Кини Хамаҕатта нэһилиэгэр 1959 сыллаахха төрөөбүтэ. Ийэтэ Анна Алексеевна, аҕата Григорий Гаврильевич Аргуновтар. Нюта оҕо эрдэҕиттэн сытыы-хотуу, бэйэтин кыанар, спорка сыстаҕас кыыс этэ.
Оскуоланы 1976 сылга бүтэрээт, Дьокуускай куоракка СПТУ-1 үөрэххэ киирбитэ. Оҕо эрэ санаата тиийбэт, слесарь сэдэх идэтин баһылаабыта. Оччолорго «Комсомольскай» совхоз саҥа тэриллэн, үлэ саҥа биригээдэлэрэ олохтоммуттара.
Нюта автопаркаҕа слесардаабыта, быыһыгар аккумулятор иитэрэ, хаамыра абырахтыыра. 1983 сыллахха совхоз администрацията Нюта көрдөһүүтүн ылынан, Граф Биэрэгэр СПТУ-2 суоппар курсугар ыыппыта. Бүтэрэн кэлэн тута совхоз «Вода» массыынатыгар суоппардаан саҕалаабыта. Хамаҕатта нэһилиэгин социальнай эбийиэктэрин итиэннэ сайынын фермалар сайылыктарын уунан хааччыйбыта. Бу сыралаах үлэҕэ биэс сыл эҥкилэ суох үлэлээбитэ, ол түмүгэр, совхоз «Чемпион суоппара» ааты ылбыта. Онтон 2 сыл совхоз кылаабынай ветеринарнай бырааһыгар Гуляева Ксения Семеновнаҕа, 3 сыл совхоз директорыгар УАЗ массыынаҕа үлэлээбитэ.
«Комсомольскай» совхоз ыраах отделениетыгар: Хатаска, Салбаҥҥа кыһыннары-сайыннары туох да саахала суох кылаабынай ветбырааһы да, директоры да тириэрдэрэ. Үлэ эрэ соруктарын толоруу буолбакка, оҕо төрөөһүнэ буоллун, кэнсиэрдэр, спортивнай күрэхтэһиилэр, үбүлүөйдэр да буоллуннар, кырдьаҕаһы тиһэх суолугар атаарыы да буоллун, түүннэри-күнүстэри Нюта батыммакка барарын хайгыылларын истэрим.
Бу үлэлиир сылларын тухары совхоз биригээдэлэрин икки ардыларыгар ыытыллар бары спортивнай күрэхтэһиилэргэ көхтөөхтүк кыттара. Совхоз үрэллибитин кэннэ 1994 сылтан 2009 сылга пенсияҕа тахсыар диэри Нам улууһун ветуправлениетыгар кылаабынай ветбырааһыгар уһуннук, үтүө суобастаахтык суоппардаабыта. Суоппар быһыытынан олус эппиэтинэстээҕин көрдөрбүтэ.
Үөлээннээхтэрэ уонна чугас ыаллара кини үөрүнньэҥин уонна олус аһыныгаһын чорботон бэлиэтииллэрэ. Ол курдук, республика суоппар дьахталлара инбэлиит оҕолорго көмө акцияларын чэрчитинэн, Собакина Оксана Павловналыын автопробекка кыттыһан Өймөкөөҥҥө тиийэ сылдьыбыта.
Анна Григорьевна Саха республикатын транспорын үтүөлээх үлэһитэ, «Отличник сельского хозяйства» туһааннааҕа. Маны таһынан 2000 сыллаахха ветеринарнай сулууспа 100 сыллаах үбүлүөйүгэр остуолга ууруллар Үрүҥ көмүс бэлиэнэн наҕараадаламмыта. Онон олоҕун бүтүннүү суоппар идэтигэр анаабыт Анна Григорьевна эр киһи эрэ суоппар буолуохтаах диэн урукку өйдөбүлү туора соппута. Бэйэтин кэмигэр сайдыы суолун тэлбитэ.
Кини кыайыыта-хотуута тимир көлөнү муоһулуон баҕалаах кыыс аймахха холобур буолбута.
Феврония Баишева, Нам улууһун кыраайы үөрэтээччи