Муус устар 27 күнэ — Сахабыт Өрөспүүбүлүкэтин күнэ. 1922 сыллаахха бу күн Саха АССР тэриллэрин туһунан РСФСР ВЦИК Президиумун Уурааҕа тахсыбыта. Онон бу күнү Өрөспүүбүлүкэбит төрүттэммит күнүнэн билинэбит.
Бу күн биһиги нэһилиэкпитигэр «Уруйдан Сахам Сирэ!» диэн үөрүүлээх тэрээһиннэр ыытылыннылар. Ол курдук, Кыайыы скверин болуоссатыгар нэһилиэк «Күбэйэ» дьахталлар түмсүүлэрин көҕүлээһининэн «Күүстээх Кэрэ-2026» үс этаптаах бырайыактарынан күрэх бастакы этаба ыытылынна. Манна нэһилиэкпит тоҕус кэрэ аҥаардара кыттыыны ыллылар. Ол курдук: хаптаһыны эрбээһин, тоһоҕо саайыыта, маһы хайытыы, тэлиэгэҕэ оҕону олордон үтүү, сыалы быраҕыы, куулу көтөҕөн сүүрүү, ийэҕэ анаммыт бэргэн этии тылларын сааһылаан таайыы, күөгүнэн балык хаптарыыта, финишкэ сүүрэн тиийии — бу барыта бириэмэҕэ ыытылынна.
Күрэх түмүгүнэн:3 миэстэ – Богатенкова Анастасия Семеновна, 2 миэстэ – Потапова Варвара Петровна, 1 миэстэ – Протопопова Мария Александровна кыайыылааҕынан тахсаннар мэдээлинэн, грамотанан наҕараадаланнылар. Кыттыбыт кэрэ аҥардарга махтал сурук туттарылынна. Бу кэннэ «Уруйдан, Сахам Сирэ!» диэн сахалыы эйгэлээх эҕэрдэ кэнсиэр буолан, Саха Өрөспүүбүлүкэтин күнэ — өрөгөй күнэ олус сэргэхтик ааста. Нэһилиэк олохтоохторо Саха сиригэр олорорбутунан бу күн уратытык тутуллан бэлиэтэнэриттэн киэн туттабыт.
Саргылана Попова, 2 Хомустаах.