Үөдэй нэһилиэгэр ыам ыйын 14 күнүнээҕи нэһилиэк баһылыгын Иван Васильевич Гаврильев 73№ дьаһалынан “Муҥутуур бэлэм буолуу режимэ” олохтонно.
Ол курдук, улуус баһылыгын солбуйааччы Филипп Васильевич Николаев кыттыылаах ыам ыйын 14 күнүгэр ыксаллаах быһыы-майгы хамыыһыйатын мунньаҕа буолан ааста.
Халаан уутугар бэлэмнэнии үлэлэр эрдэттэн ыытыллан билиҥҥи туругунан быстах кэмҥэ нэһилиэнньэни көһөрүү, баайы-дуолу өрө тардыы, сүөһүнү, сылгыны үрдүк сиргэ таһаарыы үлэтэ барар. Оскуолаҕа үөрэх, уһуйааҥҥа дьарыктар тохтотуллан дистанционнай режимҥа көстүлэр. Муус устар ыйга хас биирдии ыалларынан уопсайа 241 олорор дьиэҕэ, 15 элбэх квартиралаах дьиэлэргэ 646 фактически нэһилиэккэ олорор дьоҥҥо ыксаллаах быһыы-майгы кэмигэр ирдэбиллэри тутуһалларыгар, халаан уутун кэмигэр быстах кэмҥэ эппиэтинэһи ылан үрдүк сиргэ көһөллөрүгэр, ханнык баҕарар балаһыанньаҕа сэрэхтээх буолалларыгар араспыыска толоруллан сэрэтии үлэлэр ыытыллыбыттара. 14 социальнай эбийиэктэргэ, 3 улахан котельнайдарга өрө тардыныы, хомунуу үлэтэ ыытыллан ыксаллаах быһыы-майгы кэмигэр бэлэм олороллор.
Быйыл буоларын курдук Хомустаах бастакы нэһилиэгэр спортивнай комплекс дьиэтигэр 50 миэстэлээх быстах кэмҥэ олорор пуун бэлэмнэннэ. Быстах олорор пууҥҥа 9 киһилээх биригээдэ үлэлиэҕэ, олорор дьон, оҕолор күҥҥэ биирдэ итии аһылыгынан хааччыллыахтара.
982 ынах сүөһү, 949 сылгы үрдүк сиргэ тахсарыгар, куттала суох сиргэ көһөллөрүгэр 6 пуун сайылыктарынан бэлэмнэнэн ыам ыйын маҥнайгы күннэриттэн көһүү саҕаланна.
Халаан уутун кэмигэр 2 МТЗ-82 тыраахтардар, 1 УАЗ массыына, 1 водовоз массыына, 1 ПАЗ автобус, 2 мотуордаах оҥочо сүүрүөхтэрэ. Эрдэттэн бэлэмнэнии үлэ чэрчитинэн, 400 лиитэрэ дизель уматыгынан, 200 лиитэрэ бензинынан хааччылларга бэлэм. Уопсайа 9 гидропостка ууну кээмэйдиир рейкалар турдулар.
Халаан уутун таһымын кэтээн көрүүгэ 16 киһилээх 4 дьуһуурустуба биригээдэтэ тэриллэн үлэтин саҕалаата.
Екатерина Эверстова, Үөдэй