Бэс ыйын күннэрэ үүнэн сайыҥҥы түбүктэр саҕаланнылар.
Хамаҕаттаҕа күнтэн күн дьон сэргэ үлэни үмүрүтэр араас тэрээһиннэргэ кыттыһаллар.
Бэс ыйын 1 күнүгэр үлэ чааһын бүтүүтэ Люция Ушницкая салайааччылаах “Сайдам” түөлбэ үгэс буолбут дьаарбаҥкатын тэрийдэ. “Ыччат Ыллыгар” хаһаайкалар хото мустан арассаада арааһын атыылаһан, атастаһан, атыылаан наадаларын ситтилэр. Тиэргэннэрин сибэккинэн симиэхтэрэ, оҕуруот аһынан дьоннорун күндүлүөхтэрэ.
Бэс ыйын төрдүс күнүгэр МАУ АРТ үлэһиттэрэ уу ситимин боруобалаан холбоотулар. Олохтоохтор сайыҥҥы кэмҥэ уунан хааччыллыы тыын боппуруос буоларын быһаарар үлэ эрдэ саҕаламмытыттан үөрдүлэр. Үлэһиттэр өрөмүөн үлэтигэр туруннулар. Саахаллары өрөмүөннээн ууну ыыта тураллар. Олохтоохтор төлөбүрү бириэмэтигэр аахсан иһэллэрин дьаһалта ирдиир.
Бэс ыйын 6-7 күннэригэр ыһыахтыыр пааркаҕа баһылык Евгений Ушницкай ыҥырыытын ылынан нэһилиэк тутууга үлэлиир уолаттара мустаннар 9 объегы икки күнүнэн бүтэрдилэр. Түмсүүлээх буолуу үөрүүнү, дуоһуйууну аҕалла.
Бэс ыйын 8 күнүгэр Кытыл түөлбэ (сал.Марфа Харитонова) хоту төбөтүгэр Суздалов, Касьянов уулуссаларыгар олорооччулар бөх тоҕор контейнер тулатын хомуйан, ыраастаан түөлбэлэрин сэргэхситтилэр, өрүү да ыраастык туталлар. Бэйэ-бэйэни убаастаһан бөҕү ыһыллыбат гына баайан, таһыгар хаалларбат курдук дьаһанарга ыҥырдылар.
Бэс ыйын 11 күнүгэр Ыһыах Ыспыт паарканы ыраастыырга субуотунньук буолла. Оҥоһуллубут саҥа тутуулары “Сканди-дом” үлэһиттэрэ үтүө баҕаларынан матырыйаалын бэйэлэрэ уйунан кырааскалаатылар.
Бу күн суоппар уолаттар “Хамаҕатта – мин дойдум” сыыр быарыгар баар суругу саҥардан биэрдилэр, үтүө дьыаланы санааларыттан оҥордулар.
Ити курдук, Хамаҕаттаҕа күнтэн күн үлэ күөстүү оргуйар, общественнай хамсааһын далааһыннанар. Нэһилиэк олохтоохторо, ордук эдэр өттө, ону тэҥэ оскуола оҕолоро бу үлэлэргэ көхтөөхтүк кытыннылар. Санаа көнньүөрэр, сүргэ көтөҕүллэр күннэрэ турдулар.
Мария Винокурова