Нэһилиэк аайы киэн туттар дьоннорун аатын үйэтитэр үтүө үгэс баар. Онтон биирэ — үлэлээбит сирдэригэр, тэрилтэлэригэр, кылаатын киллэрбитин сыаналаан, айан-тутан хаалларбыта сүдү суолталааҕын бэлиэтээн ааты иҥэрии буолар.
Хамаҕаттаҕа нэһилиэк социальнай-экономическай сайдыытыгар улахан кылааттарын киллэрбит үтүөлээх дьон ааттара иҥэриллибит 5 тэрилтэ баар. Хаһааҥҥыттан туох иһин ааттара ааттанарын кылгастык санаттахха:
Хамаҕатта орто оскуолатыгар Хамаҕаттаттан төрөөн-үөскээн тахсыбыт биллиилээх худуоһунньук Ефим Михайлович Шапошников(1926-1971) аата иҥэриллибитэ.
Ол курдук, 2001 сыл алтынньы 24 күнүгэр улуус уонна Хамаҕатта нэһилиэгин общественноһын, орто оскуола коллективын туруорсууларын өйөөн уонна саха графига, оҕо худуоһунньуга Е.М. Шапошников аатын үйэтитэр инниттэн улуус Мунньаҕын X сессиятыгар улуус Мунньаҕын председателэ Николай Баишев илии баттааһыннаах дьаһала тахсыбыта.
Хамаҕаттаҕа икки этээстээх спорт дьиэтигэр нэһилиэк баһылыга Александр Дунаев 2006 сыл ахсынньы 5 күнүгэр Дьаһал таһааран Николай Петрович Габышев (1945-1998) аата иҥэриллэрин ситиспитэ: “На основании Решения №4 сессии наслежного Совета МО Хамагаттинский наслег от 26.10.2006 года распоряжаюсь: В связи с юбилейными мероприятиями 30-летия образования совхоза “Комсомольский” и за большой вклад в социально-экономическом развитии с.Крест-Кытыл, за неоценимую работу по воспитании подрастающего поколения по физической культуре и спорту присвоить имя Габышева Николая Петровича, бывшего директора совхоза “Комсомольский”, мастера спорта СССР по вольной борьбе Дому спорта с.Крест-Кытыл МО Хамагаттинский наслег Намского улуса РС(Я)”.
2014 сыллаахха от ыйын 7 күнүгэр Хамаҕатта нэһилиэгэр VI-c спортивнай оонньуулары көрсө саҥа тутуллубут “Эрчим” СК үөрүүлээхтик аһыллыбыта. Николай Габышев аата салгыы саҥа спорт комплекска көспүтэ.
“Кэскил” саха балаҕана үөрүүлээх аһыллыыта 2007 сыл сэтинньи 10 күнүгэр буолбута.
Ити сыл ахсынньы 27 күнүгэр олохтоох дьаһалта уонна депутаттар сессияларын быһаарыытынан “Кэскил” балаҕаҥҥа тутуутун саҕаласпыт, улахан кылаатын киллэрсибит уруккута “Комсомольскай” сопхуоска тутуу биригэдьииринэн, прорабынан үлэлээбит маастар-тутааччы Дмитрий Дмитриевич Новгородов (1946-2007) аатын иҥэрэр туһунан дьаһал тахсыбыта.
2009 сыллаахха нэһилиэк дьаһалтатын, депутаттарын сэбиэтин уурааҕынан ветеринарнай быраас Макар Саввич Амбросьев (1935-1991) аата нэһилиэк сайдыытыгар өр сыллаах бэриниилээх үлэтин, сопхуос сүөһүтэ-аһа үксүүрүн, доруобай хаһаайыстыбалаах буоларын туһугар ахсаабат сыратын уурбутун иһин Хамаҕатта ветеринарнай лечебницатыгар иҥэриллибитэ.
2021 сыл ыам ыйын 27 күнүгэр улуус баһылыга Юрий Слепцов, улуус Мунньаҕын председателэ Иван Попов илии баттааһыннаах Дьаһалынан Хамаҕатта саха-француз лицейэ Виталий Петрович Артамонов (1947-2020) аатын сүгэр буолбута: “Пp. 5-l. O npucвоенuu имени Виталия Петровича Артамонова, зacлуженного работника народного хозяйства РС(Я), дипломата, первого министра внешних связей РС(Я) муниципальному бюджетному общеобразовательному учреждению «Хамагаттинский саха-французский лицей”муниципального образования “Намский улус” РС(Я)”.
Аат иҥэриллиэҕиттэн саҕалаан үйэтитии барар, нэһилиэк историятын сорҕото буолан көлүөнэттэн көлүөнэҕэ барар. Биллиилээх дьоммут ааттара ааттана турдун, үтүөлэрэ умнуллубатын!
Мария Винокурова, Хамаҕатта