Арбын нэһилиэгэр Ийэ күнүгэр аналлаах көлүөнэлэринэн биэчэр үрдүк тэрээһиннээхтик буолла.
Алтынньы 19 күнүгэр «Тускул» култуура киинигэр Ийэ күнүгэр аналлаах «Цветная вечеринка» тэрээһин ыытылынна. Нэһилиэк ийэлэрэ түөрт көлүөнэнэн арахсан күрэхтэстилэр. Кыттааччылар сэрэбиэйинэн (жеребьевканан) дьүһүннэри таланнар, ол дьүһүннэринэн фотозона оҥороннор, ас астааннар, остуол сервировкалаан, талбыт өҥнөрүнэн түөрт көрүҥҥэ: дьыалабыай, күннээҕи, спортивнай, киэһээҥҥи муода көрдөрдүлэр, флешмоб үҥкүүлээтилэр, өҥнөрүнэн тыллаах элбэх ырыа ыллаатылар.
Ийэлэр олус кыһаллан бэлэмнэнэн, көхтөөхтүк кыттан, биэчэр үрдүк таһымҥа ааста. Күрэх түмүгүнэн кыттааччылар “Бастыҥ фотозона”, “Бастыҥ остуол”, “Бастыҥ көстүү”, “Кэрэ Куолар” диэн номинациялары ыллылар. Ону таһынан, барыта сүүйүүлээх лотерея оонньонно.
Оксана Соловьева, «Тускул» култуура киинин дириэктэрэ