Хатыҥ Арыытааҕы ветеринарнай лечебница үлэҕэ, улуус, нэһилиэк общественнай олоҕор көхтөөх тэрилтэнэн биллэр. Быйыл ветлечебница 2025 сыл түмүгүнэн Нам улууһугар «Лучший ветеринарный участок» үрдүк аатын ылбыта.
Ветеринарнай лечебницаны Екатерина Александровна Матвеева сатабыллаахтык салайан илдьэ сылдьар. Отуттан тахса сыл үлэлиир баай опыттаах, дириҥ билиилээх ветеринарнай быраас Николай Григорьевич Дьяконов уонна эдэр исписэлиис ветеринарнай быраас Галина Петровна Евстафьева үлэлииллэр.
Интервью ылар кэммэр Галина Евстафьева Кыһыл Дэриэбинэҕэ вызовка бараары олорорун тутан ыйыталастым.
«Хатыҥ Арыы нэһилиэгэр билиҥҥи туругунан 292 ньирэй төрөөтө. РЭГ «АГРА» программаҕа сүөһүнү, сылгыны регистрациялаан, нүөмэрдээн, чиптаан киллэрэллэр. Дьиэ кыыллара ыт уонна куоска эмиэ чиптаныахтаах уонна «Все звери» диэн программаҕа киириэхтээх. Куоска, ыт сылга биирдэ бешенство утары прививка хайаан да ылыахтаах. Онтон сүөһү, сылгы сыл устата ылыллар прививката, анализтара элбэхтэр. Хас биирдии ыттаах, куоскалаах ыаллар өйдөөннөр бэйэлэрэ ветеринарнай лечебницаҕа кэлэн регистрациялыахтаахтар, ыттарын баайыахтаахтар.
Ветлечебница үлэһиттэрэ аныгы үйэ ирдэбилинэн араас программаҕа үлэлиир үлэбит элбэх. Документация, регистрация, прививка, вызовка барыы, ыйдааҕы, квартальнай араас анализтары ылабыт, уколлары оҥоробут» — диэн Галина Петровна түмүктээтэ.
Ветеринарнай лечебница коллектива нэһилиэккэ сыллата ыытыллар хаар, муус оҥоһук күрэҕин хас да төгүллээх номинаннара, нэһилиэккэ ыытыллар бары тэрээһиннэргэ, акцияларга көхтөөхтүк кытталлар, улууска биир бастыҥ үлэлээх коллектив буолар.
Екатерина Александровна салайар ветеринарнай лечебница коллективыгар уонна бүгүн аанньалын күнүнэн Галина Евстафьеваҕа үлэлэригэр үрдүктэн үрдүк ситиһиилэри, чэгиэн доуобуйаны, байылыат олоҕу, дьиэ кэргэннэригэр этэҥҥэ буолууну баҕарабыт.
Надежда Сивцева