Мария Егоровна Охлопкова аатынан Түбэ орто оскуолатын үөрэнээччилэрэ улууска да, өрөспүүбүлүкэҕэ да ыытыллар авиамоделированиө күрэхтэригэр куруук инники күөҥҥэ сылдьааччылар, бириистээх миэстэлэри ылааччылар. Салайааччы Алексей Павлович Сивцев уолаттары кыра эрдэхтэриттэн үөрэтэн-такайан, уһуннук көтер самолеттары оҥотторон дьон биһирэбилин ылан кэлбиттэрэ.
Бу кулун тутар ыйга үчүгэй авиамоделлаахтары Новосибирскай уобалас Бердск куоратыгар ыҥырбыттара. Онно Түбэ үөрэнээччилэрэ Ильдар Бубякин (8 кыл.), Эрсан Григорьев (8 кыл.), Артём Сивцев (7 кыл.) олус үчүгэйдик, ситиһиилээхтик кытыннылар. Улахан бөлөххө 10-ча хамаанда, 100-чэкэ кыттааччы араас куораттартан кытта кэлбиттэр. Ол иһигэр, Саха өрөспүүбүлүкэтиттэн Өктөм оҕолорун хамаандата эмиэ баар эбит.
Кулун тутар 7-8 күннэригэр тыҥааһыннаах киирсии кэнниттэн, күрэх түмүгүнэн Нам улууһун Түбэ оҕолоро хаачыстыбанан 3 миэстэ буолары ситистилэр, Бердск куораттан үөрүүлээх сонуну биллэрдилэр. Авиамоделированиенан дьарыктыыр Алексей Павлович Сивцевкэ үчүгэй хамаанданы бэлэмнээбитин иһин махтал сурук туттардылар. Инникитин даҕаны оҕолорго, салайааччыга элбэх опыты, өссө үрдүк ситиһиилэри баҕарабын! Маладьыастар!
Полина Шестакова