Бүгүн Нам улууһугар, муус устар 25 күнүгэр, Бүтүн Россиятааҕы «Библионочь-2025» акция чэрчитинэн, Н.М. Рыкунов аатынан улуустааҕы модельнай библиотекаҕа Россия уонна ДНР Геройа Сунтаар улууһун Уһун Күөлүттэн төрүттээх Дмитрий Егоров –Сунтаар төрөөбүтэ 50 сылыгар, итиэннэ Чурапчы Мырылатыттан төрүттээх, Намҥа үлэлээбит «Эр санаа» уордьан кавалера Николай Романов – Ронины кытары дьиҥнээх бойобуой доҕордоһууларыгар анаммыт «Бойобуой доҕордоһуу чаҕылхай туоһулара…» диэн документальнай сэһэн кинигэ биһирэмэ буолла.
Дмитрий Егоров уонна кини бойобуой доҕоро Николай Романов байыаннай дьайыыга барыахтарыттан тиһэх күннэригэр диэри күннэрин-дьылларын бииргэ сылдьыбыт дьон кэпсээниттэн уонна эйэлээх олоххо үлэлэрин, чугас дьоннорун туһунан ахтыылартан таҥан ааптар, 1979 с. Вьетнам Социалистическай республикатыгар бойобуой сулууспаҕа сылдьыбыт, «За Дальний поход» бэлиэлээх, Эдуард Еремеев документальнай сэһэни суруйбутун Л.А. Попов аатынан Сунтаар киин библиотеката бэчээккэ бэлэмнээбит. Кинигэ 1000 экземплярынан «Дани-Алмас хампаанньа» ХЭТ кинигэ кыһатыгар бу саас бэчээттэнэн тахсыбыт.
Кинигэ биһирэмигэр «Нам улууһугар» МТ депутаттарын сэбиэтин председателэ Алексей Винокуров, улуус баһылыгын экономикаҕа уонна үпкэ солбуйааччыта Екатерина Саввинова, Герой Дмитрий Егоров бииргэ төрөөбүт убайа, өрөспүүбүлүкэтээҕи оперативнай штаб координационнай киин хамыыһыйатын «Вместе к Победе!» киинин үлэһитэ Алексей Егоров, Нам улууһугар олорор аймахтара, Николай Романов бииргэ төрөөбүт эдьиийэ Лена Ильина, олоҕун алгыһа Нюргуяна Романова, көһөн кэлбит сылларыгар биир олбуорга эн-мин дэһэн ыаллаһа олорбут, улуус ветераннарын сэбиэтин председателэ Софья Кобякова, бииргэ алтыспыт кэккэ нэһилиэктэр баһылыктара, бииргэ үлэлээбит коллегара, «Буойун» байыаннай дьайыылар бэтэрээннэрин түмсүүтүн председателэ Павел Оконешников уонна ыҥырыылаах ыалдьыттар кыттыыны ыллылар. Бүлүү куоратыттан Дмитрий Егоров аҕата Николай Алексеевич уонна Сунтаартан кинигэ ааптара Эдуард Данилович быһа сибээһинэн холбонон санааларын үллэһиннилэр. Үйэтитии суолунан ыччака холобур буоллун диэн салгыы киинэ уһулуу былааннаммытын, Дьокуускайга паамытынньык туруохтааҕын иһитиннэрдилэр.
Мырылаттан төрүттээх «Эр санаа» уордьан кавалера Николай Романов – Ронин 2011 сыллаахтан Нам улууһун дьаһалтатыгар уопсай отдел кылаабынай специалиһынан үлэтин саҕалаабыт. Хатыҥ Арыы нэһилиэгин дьаһалтатыгар экономикаҕа уонна үпкэ кылаабынай специалиһынан, улуус кииннэммит бухгалтериятыгар экономист-бухгалтерынан, улуустааҕы култуура уонна духуобунай сайдыы управлениетыгар экономикаҕа уонна үпкэ кылаабынай специалиһынан, кэлин улуус дьаһалтатын экономическай сайдыы управлениетын кылаабынай специалиһынан үлэлии сылдьан начальник солбуйааччытынан анаммыта.
Бүгүн Николай Николаевиһы улуус дьаһалтатын тутаах, сүрүн, туйгун үлэһитин, ханна да үлэлээтэр үтүө суобастаах, эппиэтинэстээх специалист быһыытынан биллэрин, үтүө, элэккэй майгытын, истиҥ доҕор, булчут буоларын үтүө тылларынан ахтан-санаан аастылар.
Николай Романов – Ронин 2023 сыл балаҕан ыйын 9 күнүгэр анал байыаннай дьайыыга хорсуннук Ийэ дойдутун көмүскүү сылдьан, «Сунтаар» позывнойдаах Россия уонна Донецкай народнай республика (ДНР) Геройа Дмитрий Егоровтыын геройдуу сырдык тыыннара быстыбыта.
Хас биирдии тыл эппит дьон «Бойобуой доҕордоһуу чаҕылхай туоһулара…» кинигэ ыччакка бойобуой доҕордуу сыһыаҥҥа, дойдуга бэриниилээх буолууга олус суолталааҕын бэлиэтээтилэр.
Семен Аргунов