Бүгүн Хатыҥ Арыы нэһилиэгэр үтүө суолталаах күн тосхойдо. Ол курдук, норуот көҕүлээһинин өйүүр программанан, «Въездная стела Хатын-Арынского наслега» проегынан уонна нэһилиэк олохтоохторо эбии харчы көрөн, үөрүүлээх быһыыга-майгыга стеланы астылар.
Стела авторынан СӨ Үтүөлээх архитектора Сергей Лукин буолар. Урбаанньыт Владислав Соловьев тэрилтэтэ манна күүс-көмө буолан үлэлэспит. История кэрэһитэ, ытык миэстэ буолар саҥа стела аһыллыытын айхаллаан, айыыларга сүгүрүйэн, аал уотун аһатан, алгыс тылын үрүҥ Алгысчыт, СӨ культуратын туйгуна Петр Охлопков тириэртэ.
Стела автора, СӨ Үтүөлээх архитектора Сергей Лукин
Үөрүүлээх түгэҥҥэ «Хатыҥ Арыы нэһилиэгэ» тыа сирин сэлиэнньэтин баһылыга Иван Ноговицын, стела проегын автора Сергей Лукин, олохтоохтор ааттарыттан Хатыҥ Арыы сельсоветын председателинэн үлэлээбит, үлэ бэтэрээнэ Николай Сивцев тыл эттилэр. Нэһилиэк баһылыга махтанан туран проект авторыгар, быһаччы үлэлэспит дьоҥҥо, тутууну ыыппыт урбаанньыкка махтал суруктары туттартаата.
Иван Ноговицын, Хатыҥ Арыы нэһилиэгин баһылыга:
— Проект үлэҕэ кииритигэр бастакынан үлэлэспит киһибит, Хатыҥ Арыы нэһилиэгин дьаһалтатын специалиһа Владимир Соловьев буолар. Хомойуох иһин, билигин убаастыыр киһибит биһиги кэккэбитигэр суоҕа хомолтолоох. Үгүс үлэ ыытыллан биир санааҕа кэлэммит, Владимир Юрьевич Сергей Иннокентьевичтыын үлэлэһэн кини проегын ылыммыппыт. ППМИ программаны икки түһүмэххэ араарбыппыт. Онон кэлэр сылга салгыы миэстэтэ өссө кэҥиэҕэ, күрүөлэниэҕэ уонна уотунан-күөһүнэн сырдатыллыаҕа. Бу программа таһынан улуус үп көрөн, дьоммут-сэргэбит биир санаанан кыттыһан уопсайа 5 мөл. кэриҥэ суумалаах проект буолар.
Саҥа стелабыт ис хоһооно, суолтата — үс сэргэ бөһүөлэктэрбит бэлиэлэрэ буолаллар. Уопсай быһаарыынан сэргэ үрдүгэр Кыһыл Дэриэбинэ, Граф Биэрэгэ, Аппааны биир тэҥ буолалларын көрдөрөр чорооннордоох. Дьон кэлэн тохтоон ааһар ытык сир буолар.
«Өр күүтүллүбүт үлэ олоххо киирэр кэмэ тосхойдо. Стела үйэлээх буоларын гына оҥорорго эскиз оҥорууттан саҕаламмыта. Нэһилиэккэ киирии бэлиэ монументальнай-декоративнай искусства биир сүрүн көрүҥэ буолар. Онон бары кыһаллан үйэлээх уонна кэрэ көстүүлээх буоларыгар үлэлээтибит. ХХI-с үйэни уҥуордаан үйэлэргэ турдун», — диэн стела автора Сергей Лукин санаатын үллэһиннэ.
Тэрээһин «Киирэн ааһыҥ алгыстаах аартыгынан, көрө-истэ сэргэҕэлээҥ, бу сиргэ эһигини куруутун күүтэр сырдык санаа!», — диэн ыллыктаах этиинэн түмүктэннэ.
Семен Аргунов
Видео: Роман Шапошников