М.К. Аммосов аатынан культура дыбарыаһыгар «Иэйии — сырдык сулуһум» эҕэрдэ эркиннээх «Иэйии» бэтэрээннэр түмсүү 30 сыллаах үөрүүлээх тэрээһинэ буолан ааста.
«Иэйии» кулууп 1996 сыллаахха тохсунньу 22 күнүгэр Нам улууһун бэтэрээннэрин сэбиэтин, Ленскэй нэһилиэк баһылыгын көҕүлээһиннэринэн коллектив быһыытынан тэриллибитэ.
Маҥнайгы салайааччынан Евдокия Назаровна Дьяконова, солбуйааччынан РФ доруобуйаҕа харыстабылын туйгуна, СӨ үтүөлээх бырааһа, бочуоттаах бэтэрээнэ, Нам улууһун уонна Ленскэй нэһилиэк Ытык Киһитэ, үлэ, тыыл бэтэрээнэ Василий Егорович Никонов.
Уус уран салайааччынан ССРС культуратын туйгуна, Нам улууһун Ытык Киһитэ, СӨ культуратын үтүөлээх үлэһитэ Татьяна Андреевна Гурьева үлэлээн саҕалаабыта.
Бүгүҥҥү күҥҥэ 32 бэтэрээн нэһилиэк, улуус олоҕун сайдыытыгар сүҥкэн кылааттарын киллэрбит, биһиги үтүө холобур оҥостор дьоммут буолаллар.
Дарина Константинова