Алтынньы 8 күнүгэр Аппааны сэлиэнньэтин «Чороон» норуот айымньытын киинигэр Аҕам саастаахтар декадаларынан үөрүүлээх тэрээһин ыытылынна. Тэрээһин «Чороон» НАК уонна нэһилиэк бэтэрээннэрин сэбиэтин көҕүлээһиннэринэн үрдүк таһымнаахтык ааста.
Бастаан нэһилиэк баһылыга Иван Ноговицын аҕам саастаахтарга эҕэрдэ тылын тиэртэ. Үбүлүөйдээх бэтэрээннэргэ Андрей Евстафьевка, Николай Степановка, Мария Дьяконоваҕа уонна Марина Машниковаҕа эҕэрдэ суруктары, грамоталары туттарда.
Хатыҥ Арыы нэһилиэк бэтэрээннэрин уонна пенсионердарын сэбиэтин председателэ Оксана Лебедева ытыктыыр бэтэрээннэри декаданан эҕэрдэлээтэ. Кини нэһилиэк ытык сирдэрин ааттарын үйэтититиигэ этии киллэрдэ. Ол курдук, хас биирдии ытык сиргэ кыра информациялаах табличкалары ыйыырга, ааттара умнуллубут уонна иккилии ааттаах сирдэри, алаастары үөрэтиигэ, испиэһэктииргэ күүс-көмө буолалларыгар ыҥырда.
Бэтэрээннэргэ анаан бу күн И.Е. Винокуров аатынан Хатыҥ-Арыы орто оскуолатын үөрэнээччилэрэ, коллектива «День мандарина» акциянан мандариннары бэлэх ууннулар. «Сандаара» 2 №-дээх оҕо сайдар киинин иитиллээччилэрэ сылаас илиилэринэн оҥорбут открыткаларын хас биирдии ыалдьыт тутан олус үөрдэ.
Буоларын курдук, итии үүттээх чэйдээх, толору астаах остуолга бэтэрээннэр олорон ирэ-хоро кэпсэттилэр, ааспыты санаан аастылар.
Бэтэрээннэргэ анаммыт бырааһынньык биир ураты түгэнинэн араас өҥүнэн биэстии киһилээх хамаандаларга арахсан, биэс соруктардаах станциялары туорааһын буолла. Уопсайа 7 хамаанда хамандыыр таланнар күрэхтэстилэр.
Саха дьахтарын уобараһа литератураҕа, “Репка” остуорайа геройдарын мозаиканан хомуйуу, уһун сахалыы тылтан элбэх тылы суруйуу, ырыа ыллааһын, кронхолл быраҕыы уонна ат сүүрдүүтүн оонньуута ыытылынна. Олус тэтимнээхтик ыытыллан аҕам саастаахтар бириэмэни билбэккэ хааллылар. Түмүккэ үс бириистээх миэстэҕэ тиксибит хамаандалар бары «Чороон» НАК худуоһунньук-оформителэ Петр Машников оҥорбут мэтээлинэн наҕараадаланнылар уонна сэмэй бириис туттулар.
Тэрээһин кэмигэр «Самородок» СК сэбиэдиссэйэ Анна Охлопкова бэтэрээннэргэ анаан «Троеборье» остуол оонньуутун ыытта. Күрэххэ Андрей Евстафьев, Олег Машников, Николай Степанов кытыннылар. Бары кыттааччылар бириистэринэн наҕараадаланнылар.
Евдокия Корчанова ветераннарга кронхолл күрэҕин ыытта. Биэчэр кэмигэр музыкальнай эҕэрдэлэрин Петр Машников, Леонид Чупров, «Сыдьаайа» үҥкүү бөлөҕө, «Эйээрэ» бтэрээннэр ансаамбыллара тиэртилэр.
Нам улууһа, Хатыҥ Арыы нэһилиэк «Ытыктабыллаах киһитэ”, оһуохайдьыт Татьяна Ивановна Евсеева алгыстаах оһуохайынан үөрүүлээх тэрээһин түмүктэннэ.
Нэһилиэкпит аҕам саастаахтарын өссө төгүл эҕэрдэлээн туран, уһун үйэни, чэгиэн туруктаах доруобуйаны баҕарабыт.
Надежда Сивцева