«Ленскэй нэһилиэк» МТ «Строительнай» түөлбэтэ бииртэн-биир сонун тэрээһини тэрийэр. Бүгүн З.А. Тихонова аатынан Намнааҕы оҕо эйгэтин «Түөлбэтигэр» кэми кэрэһэлиир эгэлгэ кэллиэксийэлэри тэниччи тарта. Мустубуттары түөлбэ депутата Анна Гоголева эҕэрдэлээтэ, сэргии көрөллөрүгэр баҕарда.
-«Строительнай» түөлбэ салайааччыта Вера Васильевна Прокопьева ыҥырыытын ылынан, улуустааҕы «Ситим» коллекционердарын түмсүүтэ СӨ Оҕо саас сылынан сорохпут эрэ кэлэн кыттабыт. Оҕолор кыраҕытыттан төрөппүттэргит, дьиэҕит малыгар харыстабыллаахтык сыһыаннаһан, кичэллээхтик ууран, билиҥҥэттэн сөбүлүүр хайысхаҕытыгар мунньууну саҕалыаххытын баҕарабын. Инникитин оҕолор уонна баҕалаахтар бары биһиги кэккэбитигэр киирэн, хаҥыы турарбытыгар баҕа санаабын тиэрдэбин, — диир салайааччы Мария Аманатова-Сандаара Баат.
Кини бэйэтэ урукку кэм малын-салын, туттар тэрили, хары чаһыларын, брелоктары, Нам улууһун нэһилиэктэрин гербэлээх, «Олоҥхо Ыһыаҕын» Аал-луук мастарын значоктарын, өрүс арыыларыттан хомуйбут таастарын көрдөрүүгэ туруорбут. Ону билиһиннэрэн кэпсээтэ. Коллекционердар бары сэдэх дьарыктарын сырдаттылар.
Ольга Белолюбская урукку кэм оҕону сайыннарар оонньуурдарын, остуоруйа дойдутун открыткаларын, оскуола тээбиринин туруорбут. Кини 3 кыл. үөрэнээччитэ Алиса Кривошапкинаҕа 80-с сыллардааҕы Рубик кубигын хомуйбутун иһин сэмэй бэлэҕин туттарда.
Варвара Охлопкова бэйэтэ оҕо эрдэҕиттэн муспут Саха сирин туһунан значоктарын, араас моһуоннаах черепаха сувенирдарын, бэйэтэ чэрэниилэҕэ уган суруйбут бөрүөлээх уруучукатыттан саҕалаан араас көрүҥүн аҕалбыт.
Максим Аргунов 1968 с. саҕалаан атыыга тахсыбыт бэчиэнньэлэр, кэмпиэттэр сууларын, сакылаат хоруопкаларын ойуутун уонна дьоҕус сиэпкэ угуллар халандаардары көрдөрдө.
Түөлбэ олохтооҕо Матрена Иванова уруучукаларын кэллиэксийэтин билиһиннэрдэ.
Араас идиэйэлэри олоххо киллэрэр депутат Анна Гоголева мунньар бэлисипиэттэрин, матассыыкылларын уонна Аан дойду норуоттарын куукулаларын туһунан кэпсээтэ.
«Строительнай» түөлбэ бас-көс салайааччылара Вера Васильевна, Анна Петровна коллекционердарга махтанан туран, сэмэй бэлэхтэрин туттардылар. «Түөлбэ» оҕолоро, педагогтара, тэрээһин кыттыылаахтара кэми кэрэһэлиир кэллиэксийэлэри сэргии, сэҥээрэ көрдүлэр.
Касьян Олесов-Олук