Бүгүн, ахсынньы 6 күнүгэр, П.И. Сивцев аатынан Намнааҕы историко-этнографическай музейга ССРС социалистическай учуотун туйгуна, РСФСР үтүөлээх экономиһа, Саха АССР норуотун хаһаайыстыбатын үтүөлээх үлэһитэ, Нам улууһун Ытык киһитэ, кыраайы үөрэтээччи Терентий Иванович Замятин төрөөбүтэ 100 сылыгар улахан дьоҥҥо «Нам улууһа – биһиги историябыт» улуустааҕы IV-с «Замятинскай ааҕыылар» ыытылыннылар.
Тэрээһин аһыллыытыгар ааҕыы кыттыылаахтарын Нам улууһун баһылыгын солбуйааччы Егор Протопопов, улуустааҕы култуура управлениетын салайааччыта Семен Ядрихинскай эҕэрдэлээтилэр, кыраайы үөрэтээччилэргэ ситиһиилээх үлэни баҕардылар.
Бу ааҕыыларга Дьокуускай куораттан эксперт быһыытынан ыҥырыллыбыт ыалдьыттарбыт – Владислав Сыроватскай, РАН СО ИГИ научнай сотрудига Саха сирин кэккэ улуустарыгар, ол иһигэр Эҥсиэли хочотугар, археологическай экспедициялар үлэлэрин, биир дойдулаахпыт, СӨ наукаларын Академиятын маамаҥҥа майгынныыр фаунаны үөрэтии отделын инженер-чинчийээччитэ Иннокентий Павлов «Якутская княгиня XVIII века» интэриэһинэй дакылааттары ааҕан, дьон сэҥээриитин ыллылар. Киирбит ыйытыыларга хоруйдаатылар.
Экспертэр дьүүллэригэр «Т.И. Замятин: олоҕо, айар үлэтэ», «Нам улууһа: сылтан сыл», «Кыайыы 80 сыла: суолталаах чинчийиилэр» секцияларга улууспут нэһилиэктэриттэн барыта 18 үлэ киирэн истилиннэ, ол иһигэр 2 үлэ тэйиччиттэн ааҕылынна.
“Замятинскай ааҕыылар” Нам улууһун историятын үөрэтиигэ, чинчийиигэ, сырдатыыга интэриэһи үөскэтэн, саҥа саҕахтары арыйар. Кыраайы үөрэтиигэ бастакы суолу тэлбит, тумус туттар киһибит Терентий Иванович Замятин аатын үйэтитэн, үлэтин салҕаан, кэҥэтэн, дириҥэтэн үтүө түмүктэри ситиһэргэ туһуланар.
Улахан дьоҥҥо ыытыллыбыт “Замятинскай ааҕыылар” түмүктэрин М.К. Аммосов аатынан культура Дыбарыаһыгар 15.00 ч. “Хочом дьонугар аныыбын” үөрүүлээх тэрээһиҥҥэ иһитиннэриэхтэрэ.
Бу дьоһун суолталаах тэрээһини Нам улууһун культураҕа, духуобунай сайдыыга управлениета, П.И. Сивцев аатынан Намнааҕы историко-этнографическай музейа, Н.М. Рыкунов аатынан Нам улуустааҕы кииннэммит модельнай библиотеката, Нам улууһун кыраайы үөрэтээччилэр, историктар уопсастыбаннай түмсүүлэрэ тэрийдилэр.
Касьян Олесов-Олук,
Видео: Роман Шапошников