Нам улууһугар кулун тутар 8 күнүгэр УАЗ массыынаалхтар “UAZ EXTREME” хаар айан күрэхтэһиитигэр мустубуттара. Ол курдук, тоҥуу хаарынан инжектордаах 21 УАЗ уонна карбюратор мотордаах 20 УАЗ үс түһүмэххэ күрэхтэспиттэр.
Инжектордаах мотордаахтарга “Флажок” түһүмэххэ Чурапчыттан “Патриот” массыына кыайыылаах, иккис Намтан “Штурм” уонна үһүс миэстэ Намтан “Егерь”. “Спринт прямая” түһүмэххэ кыайыыны “Егерь”, иккис миэстэ Намтан “Штурм” уонна үһүс Чурапчыттан “Марлин” ылбыттар. 1,5 км дистанция уһуннаах “Спринт Экстрим” түһүмэххэ “Егерь” бастакы, иккис Намтан “Хантер”, үһүс Намтан “Вулкан”.
Үс түһүмэх түмүгүнэн, муҥутуур кыайыылааҕынан Нам улууһун “Егерь” массыына хаһаайына ааттанар. Иккис “Штурм” (Нам) уонна үһүс “Хантер” (Нам).
Карбюратор мотордаахтарга. “Флажок” түһүмэххэ Мэҥэ Хаҥаластан “Добун” кыайыыны ылар. Иккис Уус Алдантан “Модун” уонна үһүс Чурапчыттан “Чэппиэтэй” буолаллар. “Спринт прямая” түһүмэххэ кыайыылааҕынан Мэҥэ Хаҥаластан “Дьураа Хара” массыына хаһаайына ааттанар. Иккис “Модун” уонна үһүс “Баат” (Уус Алдан). “Спринт Экстрим” түһүмэххэ “Дьураа Хара” массыына иннин кимиэхэ да биэрбэтэх. Иккис “Модун” уонна “Вулкан” (Нам).
Үс түһүмэх түмүгүнэн, муҥутуур кыайыылааҕынан Уус Алдан улууһун “Модун” массыына хаһаайына ааттанар. Иккис “Дьураа Хара” (Мэҥэ Хаҥалас) уонна үһүс “Баат” (Уус Алдан).
Нам улууһугар ыытыллыбыт “УАЗ экстрим” күрэхтэһии ураты түһүмэҕинэн “Эстафета дружбы” түһүмэх буоларынан ааттанар. Хамаандаҕа икки инжектор уонна икки карбюратор мотордаах массыыналар киирбиттэрин “Лидер” спорт киин дириэктэрэ Иван Яковлев этэр. Массыыналар куоталаһыыларын “Лидер” спорт киин үлэһиттэрэ көрөн-истэн дьүүллээбиттэр.
Ол курдук, “UAZ EXTREME” хаар айан күрэхтэһиитигэр кэлээччилэр улуустарынан буолбакка, аата да этэрин курдук, “Эйэ эстафетатыгар” сэрэбиэй быһыытынан арахсан хамаанда туруорбуттар. Эстафетаҕа кыайыыны “Дьураа Хара” (Уус Алдан), “Мындыр” (Нам), “Форвард” (Таатта), “Баатара” (Мэҥэ Хаҥалас) холбоһуктаах хамаандата суруммут. Иккис миэстэ – “Добун” (Мэҥэ Хаҥалас), “Баат” (Уус Алдан), “Мамонт” (Дьокуускай), “Вулкан” (Нам). Үһүс миэстэ – “КА-2” (Нам), «Вулкан» (Нам), “Гром” (Таатта), “Егерь” (Нам).
Күрэхтэһээччи, киһи кыайыынан өрөгөйө үрдүүрүгэр анаммыт баҕа санаа, тыл элбэҕи оонньуур. Итиннэ биллэн турар, кыайыыга сирдиир күүстээх тыллар ананаллар. “UAZ EXTREME” хаар айан күрэхтэһиитигэр Владимир Сыромятников-Дьиэрэй алгыс анаабыт, Толомон Эллэй Лөгөй уола ылбаҕай ырыатынан эр дьону күрэхтэһиигэ өрө көтөхпүт, көҕүлээбит.
“Нам улууһугар инжектор уонна карбюратор мотордаах массыыналарга олус бэртээхэй күрэхтэһии буолан ааста. Кыайыылаахтар бука бары уу харчынан наҕараадаланнылар. Муҥутуур кыайыылаахтар 50 тыһ. солк. наҕараадаланнылар.
Бу курэххэ Чурапчы улууһуттан кыттыбыт соҕотох кэрэ аҥар суоппар “Пепан” хамаандаттан Вера Феофановаҕа “Нам Авто леди” кулууп урукку кэмнэргэ Нам улууһун өрөспүүбүлүкэҕэ аатырдыбыт Соловьева Татьяна Владимировна аатынан бириис хаһаайкатынан буолла. Маны таһынан, урукку кэмнэргэ биир да күрэҕи көтүппэт “СССР” экипаж суоппара Иннокентий Игнатьевич Гаврильев-Дядя Кеша оҕолоро анал бириистэри олохтоотулар”, – диир Иван Васильевич.
Харысхан Попов