Кулун тутар 20 күнүгэр Намҥа «Мэхээлэчээн булчут» («Мои таежные каникулы») уус-уран киинэ экраҥҥа тахсар күнэ үүннэ. Буойун-суруйааччы Тимофей Сметанин уонна үтүөлээх учуутал Яков Стручков суруйбут “Мэхээлэчээн булчут кэпсээннэрин” айымньытыгар олоҕурбут киинэ киэҥ экраҥҥа көстүбүтэ иккис күнэ. Хартыына «Сахабэчээт» тэрилтэ Ulus.Media редакциятын сэргэх бырайыагынан уһуллубута.
Сүрүн геройу — Мишугу бэйэбит оҕобут, Искра оскуолатын үөрэнээччитэ, Дамир Дьяконов толордо. Туруорааччы режиссер эмиэ биир дойдулаахпыт, айар куттаах ырыаһыт Александр Лукин буолар. Ол иһин Нам улууһун олохтоохторугар бу киинэ ураты суолталаах.
Саҕаланыан иннинэ киинэ уһуллуутугар үлэлээбит бөлөҕү кытта көрсүһүү буолла. Айар бөлөх салайааччыта, режиссер кылгастык киинэ хайдах уһуллубутун сырдаттылар. Киинэҕэ тутуспутунан үлэлээбит хамаанданы, оруолларга оонньообут артыыстары сирэй көрсөн, кэпсээннэрин истэн астынныбыт.
Бэлиэ түгэнинэн Нам улуустааҕы үөрэх управлениетын начальнига Мария Игнатьева, ТХУ начальнига Владимир Макаров, Искра тыа сирин түөлбэтин баһылыгын солбуйааччы Ольга Белолюбская, И.Е. Москвитин аатынан Искра ситэтэ суох орто оскуолатын дириэктэрэ Ульяна Винокурова, оскуола учуутала Анастасия Иванова айар бөлөххө, артыыстарга, кыра герой ийэтигэр Александра Дьяконоваҕа эҕэрдэлэрин тиэртилэр, сэмэй бэлэхтэрин туттардылар. Дамир кылааһын салайааччыта, бииргэ үөрэнэр оҕолоро үөрэн-астынан күргүөмүнэн: «Дамир маладьыас!» диэн эҕэрдэлээтилэр.
Ол кэнниттэн Саха сиригэр бастакы саҥарар кыыллардаах балтараа чаастаах киинэ көһүннэ. Бүтээтин айар бөлөх кыттыылаахтара көрөөччүлэр ыйытыыларыгар хоруйдаатылар. З.А. Тихонова аатынан Намнааҕы эбии үөрэхтээһин «Түөлбэ» оҕо киинин дириэктэрэ Надежда Дьячковская, методист Ольга Потапова, бизнес-инкубатор салайааччыта Аксинья Павлова оскуолаҕа үөрэнэ сылдьан дьарыктаммыт режиссер Александр Лукиҥҥа киинэ эйгэтигэр дьоһун үлэтэ тахсыбытынан эҕэрдэлээтилэр, сибэкки дьөрбөтүн, сэмэй бэлэхтэрин туттардылар, барыларыгар ситиһиилэри баҕардылар. Сүрүн герой ийэтэ Александра Дьяконова уолугар Дамирга киинэҕэ уһулларыгар кыах биэрбиттэригэр махтанна, уола оруолга оонньуурун сөбүлээбитин, өссө да ыҥыралларыгар баҕа санаатын тиэртэ, сибэкки дьөрбөтүн, бэлэхтэрин утары уунан ыалдьыттары үөртэ.
Уус-уран киинэ Намҥа сүрэхтэниитэ хайдах ааста? Видеоҕа билис.
Касьян Олесов-Олук.
Видео: Роман Шапошников.