Намнааҕы Олоҥхо дьиэтэ «Азия оҕолоро» оонньуу кыттааччыларыгар анаммыт «Олоҥхо дойдута» программаҕа кыттыаҕа.
П.П. Ядрихинскай-Бэдьээлэ аат. Намнааҕы Олоҥхо дьиэтин директора Вера Колпашникова:
«Олоҥхо дьиэлэригэр биир кэлим ситими олохтуур СӨ Ил Дарханын ыйааҕын көмөтүнэн, биһиги үлэбит өйөбүллэннэ.
2023 сылга хаҥатынарга туһуламмыт бырайыак көмүскээн, Олоҥхобут дьиэтигэр сыана саҥардылынна, Led — экран атыыластыбыт. Маны тэҥэ сценическэй көстүүмнэри тигиннибит. Бу билигин «Азия оҕолоро» оонньуу уопсай программатыгар кыттабыт.
Бэлиэтээн эттэххэ, кэнники сылларга тыа сирдэригэр культура эбийиэктэрин тутуу улахан болҕомто ууруллар. 2011 сылга Белгородскай уобаласка тиийэн тыа интеллигенциятын форумугар кыттыбытым. Онно В. Путины кытта көрсүһүүгэ тыа сирдэригэр культура инфраструктураларын саҥардыы туһунан кэпсэтии буолбута.
Биһиэхэ, Намҥа, 2022 сылга Культура дыбарыаһа олоххо киириэҕиттэн, олохтоохтор тэрээһиннэргэ сылдьыылара биллэрдик эбилиннэ. Итиэннэ Хатырыкка культура уонна спорт киинэ тутулунна».
Бэс ыйын 27 уонна 28 күннэригэр Дьокуускайга Орджоникидзе болуоссатыгар бастыҥ олоҥхоһуттар, төрүт культураны тарҕатааччылар оонньуу ыалдьыттарыгар, кыттааччыларыгар киһи-аймах шедевринэн билиниллибит Олоҥхо дойдутун алыптаах эйгэтин билиһиннэриэхтэрэ.
Программа өрөспүүбүлүкэ Олоҥхо дьиэлэриттэн 250 кыттааччыны: Мэҥэ Хаҥаластан, Үөһээ Бүлүүттэн, Бүлүүттэн, Амматтан, Горнайтан, Чурапчыттан, Намтан, Уус Алдантан, Кэбээйиттэн, Ньурбаттан түмтэ.
Бүгүҥҥү күҥҥэ 11 Олоҥхо дьиэтэ норуот эпоһын үйэтитэр, харыстыыр, Олоҥхону толорор уонна истэр культураны тарҕатар туһугар күүскэ үлэлииллэр.
Кэнники 5 сылга өрөспүүбүлүкэ үрдүнэн 45 культура эбийиэгэ, ол иһигэр дыбарыастар Бороҕоҥҥо, Намҥа, Бүлүүгэ киирдилэр.
Дойду президенэ бу дьыл бэс ыйын 18 күнүгэр Дьокуускайга кэлэ сылдьан Саха сирин олохтоохторун талааннарын, төрүт культураҕа харыстабыллаах сыһыаммытын бэлиэтээбитэ. Бүтүн Уһук Илин регион эдэр специалистарын кытта көрсүһүүтүгэр өрөспүүбүлүкэбит тыа сирдэригэр культура дыбарыастарын тутарын холобурдаан дьоһун сыанабылы биэрбитэ. Бу туһунан СӨ Ил Дарханын, правительствотын пресс-сулууспата иһитиннэрдэ.
Лена Ноговицына