Нам улууһун «Отуу уота» литературнай түмсүүтэ Улуу Кыайыы 80 сылыгар ананан алтынньы 16 күнүгэр биһирэмнээбит «Улуу Кыайыы өлбөөдүйбэт чаҕыла» саҥа кинигэтигэр аан тылы салайааччы Алексей Татаринов-Удьурҕай итинник төбөлөөн суруйбут. Тэрээһиҥҥэ ону туоһулуурдуу Алексей Михайлович айар куонкурустар түмүктэрин иһитиннэрдэ.
«Таҥара кийиитэ» хоһоон күрэҕин кыайыылаахтара:
-суруйааччыларга:
1 м. — Мария Мохначевская-Марта-Мария.
2 м.- Николай Федотов-Уран Утум.
-сойууһа суохтарга:
1 м — Дария Дьяконова-Кустуктаах.
2 м.- Надежда Рыкунова-Кыыдаана.
3 м.- Христина Софронова-Сардаҥа.
4 м.- Прасковья Новгородова-Чэлгийээнэ.
Кыра саастаах оҕолорго аналлаах 5-тии тэттик хоһооннору хоһуйуу күрэҕин кыайыылаахтара:
1 м. — Аскалон Егоров-Өркөн Дьол.
2 м. — Юрчана Парникова.
3 м. — Елена Никитина-Ууллар.
4 м.- Варвара Попова-Талаһалаах Кыыһа.
Кини айар талан куонкурустарын кыайыылаахтарын сыаналаах бириистэринэн, сертификаттарынан наҕараадалаата.
-Прасковья Байанаева бэйэтинэн ылсыһан, барытын сүрүннээн, дьаһайан саҥа кинигэбит таҕыста. Кини солбуйааччы бэрэссэдээтэлинэн Александр Дунаев саҕаттан баччаҕа диэри таһаарыылаахтык үлэлиир. Мария Мохначевская-Марта-Мария саҥа кинигэҕэ тэҥҥэ үлэлэстэ, куруутун иннинэн буолан элбэх көмөнү оҥорор. Григорий Эверстов-Тыыппалаах «Отуу уота» — олох уота» кинигэбитин редакциялаан улахан төһүү күүс буолбута, түмсүүбүт үлэтигэр куруутун инники сылдьар. Онтон Зинаида Нератова-Тупсууна А.Г. Дунаев саҕаттан кассирдаан уонна ыытыллар үлэлэрбитигэр биирдэ да батыммакка, куруутун баҕатын күүһүнэн күүс-көмө буолан, бэйэтин массыынатынан кэлэн-баран улаханнык өйөөн кэллэ, — диэн туран Удьурҕай кынат дьонугар махтанан сыаналаах бэлэхтэри туттарда.
А.М. Татаринов-Удьурҕай «Отуу уота» литературнай түмсүүнү 2021 с. балаҕан ыйыттан салайар. Бэйэтэ ахтарынан, түмсүүгэ барыта 64 киһи киирэр, ол иһигэр — 11 суруйааччылар сойуустарын чилиэнэ. Бу тэрээһиҥҥэ 2 киһини ылла — Юрчана Парникованы уонна Анна Гоголеваны. Кинилэргэ удостоверениелары, фирменнэй лиэнтэлэри, түөскэ анньыллар бэлиэлэри, кинигэлэри бэлэхтээтэ.
Салайааччы араас тэрээһиннэри көҕүлээн ыытар. Дьоро киэһэ чэрчитинэн сайын тэриллибит «От сыта» күрэх кыттыылаахтарын ортотугар сүүйүүлээх оонньуу ыытыллан, 19 бириис хаһаайыттарын булла. Икки сүрүн бириис — Владимир Федотовка-Одуҥҥа паравой өтүүк, Күннэй Уран Саргын кыыһыгар куухуна тээбириннэрин набора тигистилэр. Бары да илии тутуурданан, өттүк хараланан үөрдүлэр-астыннылар, олохторун сэргэхситэр бас-көс киһилэригэр махтаннылар.
Алексей Михайлович «Отуу уотун» тэрээһиннэригэр спонсордаабыт «Пирамида» ХЭТ (дир. Г.Н. Сивцев) уу харчынан, «Ткани +», «Лавка чудес» маҕаһыыннар сертификаттарынан, 1 Хомустаах «Аартык» маҕаһыына (ИП Г.Г. Шарапов) бирииһинэн көмөлөспүттэригэр дириҥ махталын тиэрдэр.
Улууспут айар куттаах «Отуу уотун» төлөнө күөдьүйүө уонна саҥа ааттар, саҥа айымньылар элбиэхтэрэ диэн эрэнэбит.
Касьян Олесов-Олук