Бүгүн Нам улууһун баһылыгын солбуйааччы Егор Протопопов сүдү композитор Василий Зырянов сырдык аатын үйэтитэр, төрөөбүтэ 90 сылыгар анаммыт тэрээһин туһунан улуустааҕы хамыыһыйа түмүктүүр мунньаҕын ыытта. Ааспыт сырыыга, сүнньүнэн, былааҥҥа киирбит сыл устата барар тэрээһиннэр туолууларын, туох үлэ ыытылла турарын туһунан кэпсэппиттэрэ. Үлэни салгыы ыытарга сорудах, ыйыы-кэрдии тиэрдиллибитэ.
Бүгүн чопчу Василий Алексеевич төрөөбүт күнүгэр М.К. Аммосов аатынан культура Дыбарыаһыгар ыытыллыахтаах, биллиилээх композиторга анаммыт “Сүдү айымньыҥ үйэлэргэ дуорайдын” түмүктүүр тэрээһин тула кэпсэтии буолла.
Сэтинньи 7 күнүгэр күнүс 15:00 ч. саҕаланар үөрүүлээх тэрээһиҥҥэ Дьокуускай куораттан культура, искусство, музыка эйгэтигэр киэҥник биллэр ыҥырыылаах ыалдьыттар кэлэллэрэ күүтүллэр. Биллиилээх композитор, киэн туттар биир дойдулаахпыт Василий Зырянов сырдык аатын үйэтитэр тэрээһин программата киэҥ. Улууспутуттан уонна тас өттүттэн элбэх хоровой коллективтар, ырыаһыттар кыттыыны ылыахтара.
Улуустааҕы культура управлениетын начальнига Семен Ядрихинскай, начальнигы солбуйааччы Александра Новгородова, “Үөдэй нэһилиэгэ” ТСТ баһылыга Иван Гаврильев, В.А. Зырянов аатынан Үөдэй нэһилиэгин “Сарыал” СК дириэктэрэ Геннадий Игнатьев, улуустааҕы ырыа айааччылар “Туллук хаара” түмсүүтүн салайааччыта Андрей Замятин уо.д.а. бэлэмнэнии үлэтин билиһиннэрдилэр, санааларын тиэртилэр.
Мунньах түмүгүнэн сүрүн болҕомтону композитор культурнай нэһилиэстибэтигэр ууран, илиитинэн суруйбут араас ис хоһоонноох музыкальнай айымньыларын оцифровкалыырга, нотаҕа түһэриигэ, анал үөрэхтээх специалиһы булан кытыннарарга, айар үлэтин наардаан, аттаран кэлэр сылга кинигэ таһаарыытыгар үлэлэһэргэ, кини олоҕун, үлэтин олохтоох хаһыакка хас да түһүмэҕинэн таһаарарга, түмүктүүр тэрээһини үрдүк таһымҥа ыытарга сыал-сорук турда.
Касьян Олесов-Олук