Россия үрдүнэн кулун тутар 25 күнэ – култуура үлэһитин идэлээх бырааһынньыга. Нам улууһун култууратын үлэһиттэригэр 2023 сыллаахха өрөбүл күн буоларынан биллэриллибитэ.
“Россия култууратын күнүгэр сөп түбэһиннэрэн, Нам улууһун баһылыга Юрий Слепцов уурааҕынан өрөбүл күн биллэриллибитэ. Улуустааҕы култуура салайааччытынан үлэлээбит Елена Заровняева уонна култуура үлэһиттэрин идэлээх сойууһун председателэ Александра Парникова өр сыллаах үлэлэрин түмүгэ буолар. Тус бэйэм улууспут салалтатыттан бу улахан болҕомто дии саныыбын”, – диир Хамаҕаттатааҕы “Түһүлгэ” норуот айымньытын киинин дириэктэрэ Антонина Харитонова.
Россия үрдүнэн тыа сирин кулууптарыгар болҕомто ууруллар. “Култуура” национальнай бырайыак чэрчитинэн кулууптары саҥардыы уонна саҥа дьиэлэри тутуу курдук үгүс үлэ ыытылынна. Үлэ ситимнээхтик барбытыттан Хамаҕатта кулуубугар быйыл саҥа “LED-экран” кэлэн турда.
“Хамаҕатталар баһылыктарбытыгар табыллыбыт нэһилиэкпит. Тыа сирин кулууптарын сайдыытыгар өйөбүл көмө харчы көрүллэригэр, чуолаан бэйэбит олохтоох дьаһалтабыт үлэлэспитэ. Ол курдук, култуура дьиэлэрэ материальнай-техническэй баазаларын тупсарыыга баһылык Евгений Ушницкай, баһылык солбуйааччытынан үлэлээбит Дарья Протопопова быһаччы көмөлөрүнэн Граҥҥа кыайаммыт ботуччу суумаҕа экраннанныбыт”, – диир дириэктэр Антонина Алексеевна.
2024 сылга кулууп техническэй баазата саҥардылларыгар нэһилиэк депутаттарын мунньаҕар үп көрүллэрэ бигэргэтиллибит. Көрүллүбүт харчынан түһүлгэлэр аппаратура, микшер, микрофон стойкалара, уот-күөс оборудованиеларын ылбыттар. Ити курдук, Хамаҕатта “Түһүлгэ” НАК саҥа таас дыбарыастартан туох да итэҕэһэ суох толору хааччыллан үлэ күөстүү оргуйарыгар бэлэмин биллэрэр. Ону тэҥэ, аныгы олох ирдэбилигэр эппиэттиир экраннаммыттарыттан нэһилиэк олохтоохторо бүттүүн үөрэллэр. Тыа сиригэр култуура эйгэтэ сайдарыгар кыһаныы, болҕомто ууруу бу буоллаҕа диэн Антонина Харитонова салайааччылаах коллектив бигэргэтэр.
Антонина Харитонова, “Түһүлгэ” НАК дириэктэрэ:
- Бюджекка көрүллүбүт харчынан, кулууп иһинэн үлэлиир түмсүүлэрбитигэр таҥас-сап тиктэрэбит. Ол курдук, Оксана Кудрина салайааччылаах “Түһүлгэ” фольклор бөлөх быйыл тэриллибитэ 15 сыла буоларынан, көстүүм тиктэрээри үлэлэһэ сылдьабыт. Манан тохтообокко, быйыл тэриллибит “Уран Оһуор” ыччат ансаамбылыгар эмиэ көстүүм тиктэрэ сылдьабыт. Кулууп иһинэн үлэлиир “Ретро Данс” норуот үҥкүү бөлөҕө таҥас тиктэрэригэр эмиэ үп-харчы көрүлүннэ.
Харысхан Попов