Бүгүн, алтынньы 10 күнүгэр, аҕам саастаахтар декадаларын чэрчитинэн, М.К. Аммосов аатынан культура Дыбарыаһын уораҕайыгар таптаһар сүрэхтэр дьоллорун холбуур ЗАГС мааны саалатыгар Хатыҥ Арыы нэһилиэгиттэн 50 сыл бииргэ өйдөһөн-өйөһөн олорбут Мария Ивановна, Григорий Николаевич Дьяконовтары уонна Нина Семеновна, Савелий Васильевич Саввиннары кыһыс көмүс сыбаайбаларынан үөрүүлээхтик чиэстээтилэр.
Ытык ыаллары Нам улууһун ЗАГС отделын салайааччыта Саргылана Азарова эҕэрдэлээн туран, 50 сыл бииргэ олорбуттарын туоһулуур сурукка илии баттатта. Нам улууһун баһылыга Юрий Слепцов истиҥ-иһирэх тылларын анаан туран, 50 тыһ. солк. суумалаах сертификаты уонна өр сыл бииргэ олорбуттарын бигэргэтэр «Дьиэ кэргэн килбиэнэ» өрөспүүбүлүкэ анал бэлиэтин туттарда.
Салгыы Хатыҥ Арыы нэһилиэгин баһылыга Иван Ноговицын, улуус дьаһалтатын дьиэ кэргэн уонна ыччат политикатын отделын салайааччыта Екатерина Евстафьева эҕэрдэлээтилэр, сэмэй бэлэхтэри, эҕэрдэ суруктары туттардылар.
Бэлиэ түгэн иккис чааһыгар Нам улууһун бэтэрээннэрин сэбиэтин бэрэссэдээтэлэ Софья Кобякова дьоһун олоҕу олорбут, эдэрдэргэ үтүө холобур буолар үбүлүөйдээх дьиэ кэргэттэри истиҥник эҕэрдэлээтэ. Кини аҕам саастаахтар декадаларын тэрээһиннэригэр, уопсастыбаннай үлэҕэ мэлдьи көхтөөхтүк кыттар бэтэрээннэргэ улуус баһылыгын Бочуотунай грамоталарын туттарда.
Олоххо бигэ тирэхтээх көмүс ыаллары оҕолоро, аймахтара эмиэ эҕэрдэлээтилэр, өйдөбүнньүк бэлэхтэри, сибэкки дьөрбөлөрүн бэлэх ууннулар. Уһуннук бииргэ олоруу, кэрэтик сааһырыы – бу дьол. Этэҥҥэ буолуҥ, уһун үйэлэниҥ ытык-мааны ыалларбыт!
Касьян Олесов-Олук