Петр Семенович Гаврильев алтынньы 4 күнүгэр 1962 сыллаахха Нам оройуонун I Хомустаах нэһилиэгэр күн сирин көрбүтэ. 1980 сыллаахха I Хомустаах орто оскуолатын бүтэрэн, армияҕа баран икки сыл сулууспалааан ытык иэһин төлөөбүтэ.
1986 с. Таастаах нэһилиэгин сөргүтүүтүгэр тахсан тутуу биригээдэтигэр тутааччынан үлэтин саҕалаабыта. Спорт эйгэтигэр сыстаҕас буолан, 1995-97 сылларга спортинструкторынан үлэлээбитэ. Бу кэннэ 3 сыл администрацияҕа тырахтарыыстаабыта. Дьиэ-уот хомунаалынай хаһаайыстыбатыгар 2001 сылтан гаас оборудованиетын өрөмүөннүүр слесарынан бу күҥҥэ диэри этэҥҥэ үлэлии сылдьар. Петр Семенович: “Бу тэрилтэбин, коллективпын, үлэбин олус сөбүлээн, бэриниилээхтик, кыһаллан үлэлии сылдьабын”, — диир.
Таастаахха кэлэн кэргэн ылан, кэргэнинээн Домна Петровналыын бииргэ олорбуттара 40 сыла буолла. 1986 сыллаахха ыал буолбуттар, 4 оҕолоохтор, 9 сиэннээхтэр. Бэйэтэ үлэтинэн эрэ муҥурдаммакка, общественнай үлэттэн аккаастаммакка үлэлиир, оннук курдук 1996 сылтан 2021 сылга диэри быыбар комиссиятыгар үлэлээбитэ, ол иһиттэн 15 сыла участковай комиссия бэрэссэдээтэлэ. Бу үлэтин иһин Москубаттан ЦИК РФ бэрэссэдээтэлиттэн Панфилова Э.А. махтал суругун туппута. Улахан баһаардар буола сылдьыбыттара, күүстээх баһаары умулларыыга сайыны быһа үлэлээбит, ону сыаналаан Саха сирин өрөспүүбүлүкэтиттэн 2021 с. бэлиэ туттарбыттара.
Уһун, бэриниилээх үлэтин иһин 2021 с. ЖКХ уонна энергетикэ министиэристибэтиттэн Бочуотунай грамотанан наҕараадаламмыта. 2022 с. Нам улууһуттан «За вклад в развитие наслега” түөскэ анньыллар бэлиэни туттарбыттара. Бу күһүн 2026 с. ЖКХ уонна энергетикэ министиэристибэтиттэн түөскэ анньыллар знагынан «За заслуги в развитии ЖКХ и энергетики РС (Я)” туттараннар, үөрүүтэ муҥура суох.
Бу ыстатыйаны суруйарбар Таастаах маастара Семен Константиновичтан үлэлэрин, үлэһиттэрин ыйыталастым, Петр Семенович туһунан маннык сэһэргээтэ:
Биһиги киһибит Петр Семенович харыс да сиргэ хамсаабакка 24 сылын үлэлии сылдьар. Бу тухары биир да саахалы тааһарбакка үлэлээн-хамсаан кэллэ. Билиилээх-көрүүлээх, уопуттаах киһи эдэр, саҥа үлэһиттэргэ сүбэһит, наставник буолан коллектив иһигэр убаастанар. Нэһилиэкпитигэр бастыҥ общественник, уус-уран самодеятельность көхтөөх кыттааччыта, ырыаһыт, бэтэрээн спортсмен, олус убаастанар киһи буолар. Кэргэнэ Домна Петровна пенсияҕа тахсыар диэри тэрилтэбитигэр 15 сыл газооператорынан эҥкилэ суох үлэлээн кэлбитэ. Домна Петровна бэйэтэ эмиэ ырыаһыт, үҥкүүһүт, уус-уран самодеятельность бэтэрээнэ.
Бу курдук биһиги тэрилтэбитигэр, нэһилиэкпитигэр Гаврильевтар курдук ыал, үлэһит дьон баар буоланнар, тэрилтэбит, нэһилиэкпит сайда-үүнэ турар.
Светлана Попова-Дайаана