Үөдэй нэһилиэгин олохтоохторо, биир дойдулаахтарбыт анал байыаннай дьайыы байыастарыгар көмө оҥорортон туора турбат.
Алтынньы 8-10 күннэригэр Хомустаах бастакы нэһилиэгин балаҕаныгар Нам улууһугар анал байыаннай дьайыы кыттыылаахтарыгар таҥастары тигиигэ маастар-кылаас ыытыллан ааспыта. Үөдэйбит нэһилиэгиттэн 4 далбар хотун Мотрена Мохначевская, Елизавета Зырянова, Анна Иванова, Ульяна Гаврильева 3 күн устата Дьокуускайтан “Илии сылааһа” өрөспүүбүлүкэтээҕи иис сыаҕын үлэһиттэрин маастар кылааһыгар кыттыыны ылбыттара. Үтүө санаалаах иистэнньэҥ ийэлэрбит, эбээлэрбит бэйэлэрин иистэнэр массыыналарын, малларын илдьэ баран байыастарга аналлаах таҥас кэмпилиэгин тигэргэ үөрэнэн кэлбиттэрэ. Күн бүгүн иистэнньэҥнэр Мотрена Мохначевская, Елизавета Зырянова эбии сакаас ылан дьиэлэригэр анал байыаннай дьайыы кыттыылаахтарыгар ичигэс таҥас тигэллэр. Инникитин иистэнэр бөлөххө анал хос биэрэргэ нэһилиэк дьаһалтата үлэлэһэр. Илиилэрин сылааһынан имигэстик бигээн тикпит таҥастара байыастарбытыгар сылаас, ичигэс буоларын туһугар сүрэхтэрин баҕатынан, амарах дууһаларынан кыһаллан, хаачыстыбалаахтык тигэллэр.
“Биир санаанан – биир сомоҕо” аахсыйаҕа нэһилиэк бары олохтоохторо көхтөөх кыттыыны ыллылар. Тэрилтэлэр биирдии күннээх хамнастарын анаатылар, үлэлээбэт пенсионердар, бэтэрээннэр 18 000 солк суумманы уу харчынан туттардылар, барыта уопсайа 211 720,16 солк. анал байыаннай дьайыы байыастарыгар туһуланна.
Түөлбэлэр, бэтэрээн сэбиэтин, оскуола коллективын көмөтүнэн эттээх бэрэски астанна, ыһаарыламмыт собо, барыанньа, бастакы суһал көмөҕө туттуллар эмп-том, гигиена мала, маскировочнай сетка нэһилиэк олохтоохторун, биир дойдулаахтарбыт көмөлөрүнэн улуус дьаһалтатын штабыгар туттарылынна.
Екатерина Эверстова, Үөдэй пресс-киин