Улуус үрдүнэн АБДь-га сылдьар байыастарга анаан көмө акция бара турар. Нэһилиэктэр ас-үөл баһыылкатын бэлэмнээн кыттыһаллар.
Ол чэрчитинэн гуманитарнай өйөбүлү бэлэмнээһиҥҥэ Хамаҕатта нэһилиэгэр “Дьоһун саас” түмсүү актива сүрүннээн көмөлөстө. Ас астааһыныгар ылсыһан “Кэскил” балаҕаҥҥа мустан 100 бэрэскини бэлэмнээтэ. Састаабын атыылаһарга пенсионердар взностарыттан туһаммыттар.
Саха бастыҥ аһын собону Арыйаан Харатаала салайааччылаах “Эркин” эр дьон түмсүүтэ илимнээн аҕалбытын, “Тупсууна” дьахтар сэбиэтин председателэ Саргылаана Индеева ыһаарылаан туттарбыт.
Түөлбэ олохтоохторо битэмииннээх сир аһын арааһыттан барыанньа буһаран кыттыстылар. Ол курдук, Кытыл, Арыы Тиит, Сайдам түөлбэлэр аҕалбыттар. Анал байыаннай дьайыы кыттыылаахтара ахтылҕаннаах дойдуларын аһын амсайан санаалара күүһүрдүн, туруктара бөҕөргөөтүн диэн түмпүттэрин баһылык Евгений Ушницкай улуустааҕы дьиэ кэргэн управлениетыгар илдьэн туттарда, общественность күүһүнэн үтүө дьыала оҥоһулунна.
Мария Винокурова