Сэбиэскэй кэмҥэ элбэх ыччат дьону түмпүт Комсомол күнүн оччотооҕу эдэр ыччат умнубат, сүрэҕэр сөҥөрдөн сылаастык ахтар.
Алтынньы 29 чыыһылатыгар — Комсомол күнүгэр Хамаҕатта общественнай түмсүүлэрин салайааччыта Сандаара Оротоо уонна «Чэгиэн» скандинавскай хаамыы түмсүүтүн салайааччы Лена Канаева Ленскэй нэһилиэк “Хардыы» түмсүүтүн ыҥыраннар көрсүһүү тэрийдилэр. Ол туһунан, “Хардыы” түмсүүттэн Людмила Григорьева — Күбэйэ хотун санаатын үллэстэр:
— Кылбаа маҥан хаардаах кырыа кыһыммыт күп — күөх сырдык халлаана ыҥыра-угуйа, күнэ сылааһынан сыдьаайа, хааман — сиимэн эти — хааны чэбдигирдиҥ, — диэбиттии бэртээхэй күнү бэлэхтээтэ. Хамаҕатталар ыҥырыыларын ылынаммыт Ленскэй нэһилиэк
“Хардыы» түмсүүтүн салайааччыта Матвеева Клара Иннокентьевна эрдэттэн былааннаабытынан бары ГАИ таһыгар 11 чааска түмсэн сатыы Хамаҕатта диэки эрэллээх хаалыктарбытын тирэх оҥостон хаама турдубут. Элбэх буолан хаамыыбыт тэтимнээх түргэн буолан биэрдэ, ааһан иһэр массыыналар сигналлаан ааһаллара, далбаатыыллара тэтиммитигэр тэтим эбэргэ дылы. Бары биир формалаах буоламмыт болҕомтолорун тартыбыт быһыылаах.
Хамаҕаттаҕа киирэргэ суолга биһигини нэһилиэк баһылыга Евгений Ушницкай, «Чэгиэн« хаалыктаах хаамыы түмсүүтүн Далбар хотуттара, салайааччы Лена Канаева, Сандаара Оротоо көрүстүлэр. Бары хааман Тимофей Николаевич Охлопков — Соттой памятнигар тиийдибит. Комсомол күнүнэн эҕэрдэлээн, барыбытыгар махтанан, Хамаҕатта нэһилиэгин баһылыга Евгений Сергеевич тыл эттэ. Сандаара Оротоо Тимофей Николаевич — Соттой туһунан киһи сэргээн, долгуйа истэр ахтыытын оҥордо, кылгас да түгэн буоллар элбэҕи биллибит. Нам оройуонун комсомольскай тэрилтэтин бүтэһик секретара (эмиэ Хамаҕатта) Маргарита Охлопкова эҕэрдэлээтэ. Памятникка венок уурдубут.
Бары тэтимнээхтик туттан Хамаҕатта нэһилиэгин саҥа тутууларын сөҕө, астына көрө-көрө саха балаҕаныгар хааман тиийдибит. Сырдык саха балаҕана киирээппитин кытта сылаас салгына имэрийэ кууһан ылла, уурбут-туппут курдук балаҕан «киириҥ, ааһыҥ” диэбиттии сырдаан,сандааран көрүстэ. Барыта сахалыы кыбытыктарынан тигиллибит олбохторо дьэрэкээн өҥүнэн оонньууллара киһи сүргэтин көтөхтө, сырдык мичээр, үөрүү кыыма сыдьаайда. Комсомол күнүгэр анаммыт араас альбомнары, вымпеллары, ахтыылары сөҕө-махтайа көрдүбүт. Элбэх астаах сандалы тула олорон ирэ-хоро кэпсэтии саҕаланна.
“Чэгиэн«түмсүү салайааччыта Лена Васильевна олус сэргэхтик түмсүүтүн туһунан кэпсээтэ, хаһан тэриллибитин, хас киһи хаамарын, элбэх үлэни ыыталларын сэргээн иһиттибит. Сандаара Оротоо Комсомол күнүнэн эҕэрдэлээн, түмсүүтүн туһунан сырдатта. Кэлбиппитигэр махтанан махтал суругу Клара Иннокентьевнаҕа туттарда, бары тэҥҥэ долгуйдубут, махтанныбыт. Сэргэх эҕэрдэлэри салҕаан Клара Иннокентьевна ис сүрэҕиттэн Комсомол күнүгэр сөп түбэһиннэрэн ыҥырбыттарыгар “Чэгиэн” түмсүүгэ махтанна,. Түмсүүбүт туһунан сырдатта . “Хардыы”түмсүү туһунан хаартысканан кэпсиир бэртээхэй буклеты Лена Васильевнаҕа, бэйэтин бастакы хоһоонун кинигэлэрин Сандаараҕа туттарда. Элбэх хоһооннортон бэртээхэй уостан түспэт ырыалар айыллан тахсыахтара — диэн санаа кылам гынан ааста. Кэскиллээх кэрэ санаа туоларыгар эрэл баар.
Людмила Николаевна “Хардыы» түмсүү туһунан ахтан-санаан кэпсээтэ. Икки ыкса сытар нэһилиэк сэргэх түмсүүлэрэ бэртээхэй «Доҕордоһуу»түмсүүтэ аһыллыбытынан эҕэрдэлээтэ уонна аны саас Нам селотугар кэлэн айылҕаҕа тахсан күрэхтэһиилээх тэрээһини ыытарга этии киллэрдэ.
Хаалыктаах хаамыы Нам улууһун «Хотугу хаамыы» федерациятын салайааччыта Дмитрий Михайлович Елисеев түмсүүгэ элбэх сэргэх былаан баарын эттэ, бары сэргээн иһиттибит. Хас биирдии нэһилиэк түмсэн улахан хамаанда буолан ыытыллар тэрээһиннэргэ күүс-көмө, тирэх буоларбытыгар ыҥырда. Дьэ, бу курдук түмсүүлэр олус сэргэхтэрин истэн саҥа санаалар киирдилэр. Дмитрий Михайлович бэртээхэй күрэхтэһиилэри оҥордо, мүнүүтэҕэ кубик хомуйдубут, манна Мария Гаврильевна Жиркова олох түргэнинэн сөхтөрдө, 25 сөкүүндэнэн кубигын барытын хомуйан кыһылкөмүс мэтээл хаһаайката буолла, бытыылкалары атыллаан туорааһыҥҥа Хаачылаана — Надежда кыайыы өрөгөйүн билэн бириис ылла.
Хамаанданан күрэххэ “Чэгиэн” түмсүү хамаандата бастакы миэстэни ылла, тоһоҕо саайыытыгар иккис миэстэни “Хардыы” түмсүү «Сулус”, үһүс миэстэни “Хардыы”“Комсомол” хамаандалара ыллылар. “Комсомолу төһө билэҕин?” диэн Екатерина Ильинична бэртээхэй викторинаны бэлэмнээн кэлбит, бары эппиэттэһэ сатаатыбыт. Саамай элбэҕи билэр буолан кыайыылааҕынан Татьяна Гаврильева таҕыста, наһаа астык бириис хаһаайката буолан бары астына үөрдүбүт. Элбэх көрдөөх оонньууларга кытынныбыт. Бары туран эрэ комсомол туһунан ырыаны ыллаатыбыт, хайдах эрэ урукку ырыалары ахтыбыт да эбиппит…
Хаһан да умнуллубат Комсомол күнэ ааста, эдэр саас кэрэ кэмигэр киирэн ааспыты ахтан аастыбыт. Кэрэ күнү бэлэхтээбит Хамаҕатта нэһилиэгин “Чэгиэн”хаалыктаах хаамыы түмсүүтүн Далбар хотуттарыгар, салайааччыларга Лена Канаеваҕа, Сандаара Оротооҕо ис сүрэхтэн махтанабыт. Бары доруобай, чэгиэн буолуҥ, дьиэ кэргэҥҥитигэр барыта санаа сылааһынан сырдык кэрэ буоллун!
Мария Винокурова