Аныгылыы көрүүлээх “Мамабатл” күрэххэ

Кыһыл Дэриэбинэҕэ, алтынньы 21 күнүгэр, «Сайдыы» СК СӨ Ийэ күнүн декадатынан «Мамабатл» улуустааҕы күрэх ыытылынна.

Күрэх «Сайдыы» СК уонна Хатыҥ Арыы нэһилиэгин «Далбар» дьахтар сэбиэтин көҕүлээһининэн ыытылынна. Айталина Винокурова күн күбэй ийэлэри, күрэх кыттыылаахтарын эҕэрдэлээн туран, хамаандаларга ситиһиини баҕарда.

Үөрүүлээх тэрээһиҥҥэ “Хатыҥ Арыы нэһилиэгэ” тыа сирин түөлбэтин баһылыга Иван Ноговицын Ийэлэр күннэринэн эҕэрдэ тылын тиэртэ уонна нэһилиэк элбэх оҕолоох ийэлэригэр: тоҕус оҕолоох СӨ «Материнская Слава» II истиэпэннээх бочуоттаах бэлиэ хаһаайката, Аппааны сэлиэнньэтин олохтооҕо Александра Романовна Паньковаҕа, сэттэ оҕолоох СӨ «Материнская Слава» III истиэпэннээх бочуоттаах бэлиэ хаһаайката, Аппааны сэлиэнньэтин олохтооҕо Ирина Даниловна Семеновнаҕа уонна Кыһыл Дэриэбинэттэн аҕыс оҕо күн күбэй ийэтэ Мария Егоровна Атласоваҕа эҕэрдэ суругун, сибэкки дьөрбөтүн туттарда.

«Мамабатл» аныгылыы көрүүлээх, түргэн-тарҕан түһүмэхтэрдээх улуустааҕы көрдөөх күрэххэ үстүү ийэлээх 6 хамаанда кэлэн кытынна. Ол курдук, Аппааны, Граф Биэрэгэ, Хатырык, Бөтүҥ уонна Намтан икки хамаанда кэлэн күөн көрүстэ.

«Сайдыы» СК уус-уран салайааччыта Михаил Сивцев күрэххэ мустубут ийэлэргэ уонна көрөөччүлэргэ күрэх сүрүн тутулун быһаарда. Уопсайа аҕыс түһүмэххэ маннык көрүннэргэ араҕыста: бэйэни билиһиннэрии, өс хоһооннору ситэрэн биэрии, ырыа бүтэһик букубатынан ыллааһын, өйтөн уруһуйдааһын, оҕо оонньуута (балык хаптарыы, пазл хомуйуу, сата таас хомуйуу), үс устуука бэчиэнньэни уута суох сиэһин, биирдэ туттуллар ньуосканан шариктары туоратыы уонна ийэлэри эҕэрдэлээн РЭП хайысханан ыллааһын.

Петр Машников, Леонид Чупров күн күбэй ийэлэри, эбэлэри бырааһынньыгынан эҕэрдэлээн ырыа аргыстаах сэмэй бэлэхтэрин ууннулар.

Күрэх кыттыылаахтара кимнээҕий? Аппааныттан «Күн ийэ», Хатырыктан «Махсыым кыргыттара», Граф Биэрэгиттэн «Девчата», Бөтүҥтэн «Сардаҥа», Намтан «Супер мамочки» уонна «Нам-Тан» хамаандалар кэллилэр.

Дьүүллүүр сүбэ Айталина Винокурова түһүмэхтэр түмүктэрин боротокуоллаан суруйан истэ. Бастакы өс хоһооннору ситэрэн биэрии күрэҕэр 6 бааллаах «Девчата» хамаанда инники таҕыста. Саамай элбэх ырыаны таайан, ыллаан «Нам-тан» хамаанда 4 баалы ылла. Өйтөн уруһуйдаан ситэрэн биэриигэ «Супер мамочки» эбии баалы ыллылар. Үс көрүҥнээх оҕо оонньуутугар кылгас бириэмэ иһигэр сорудаҕы толорбут «Күн Ийэ» хамаандата буолла. Бэчиэнньэ сиэһиҥҥэ 5 очукуолаах «Девчата» хамаандата кыайыыны ылла. Көрдөөх «Переправа» күрэҕэр «Күн Ийэ» хамаандата кыайыылаах таҕыста. Түмүктүүр РЭП толоруутун күрэҕэр уһулуччу талаанын көрдөрөн «Күн Ийэ» хамаандаттан Айталина Сивцева кыайылааҕынан тахсан, 2 баалы эбии ылла.

Түмүккэ 28 очукуолаах Аппааныттан «Күн Ийэ» хамаандата кыайыылаах тахсан «Копир+» маҕаһыыҥҥа 3000 солк. сертификатынан наҕараадаланна. Иккис миэстэни Намтан «Супер мамочки» хамаандата 25 очукуолаах ылан, «Копир+» маҕаһыыҥҥа 2000 солк. сертификаты тутта. Граф Биэрэгиттэн «Девчата» хамаандата 24 очукуону ылан 3 миэстэҕэ тахсан, «Копир+» маҕаһыыҥҥа 1000 солк. сертификатынан бэлиэтэннэ. Хамаандалар бары грамоталарынан наҕараадаланнылар. Күрэххэ кэлэн кыттыбыт хамаандалар туоһу суруктары уонна сэмэй бэлэхтэри туттулар.

Хатыҥ Арыы нэһилиэгин дьахтар сүбэтин салайааччыта Дария Мальцева элбэх оҕолоох үс ийэҕэ, Аппааныттан кыттыбыт «Күн Ийэ» хамаандаҕа уонна «Нам-Тан» хамаандаҕа бары үтүөнү-кэрэни анаан туран, женсовет аатыттан сэмэй бэлэхтэри туттарда. Граф Биэрэгин дьахтар сүбэтин чилиэнэ Мария Атласова Граф Биэрэгиттэн кыттыбыт «Девчата» хамаандатыгар бэйэтин аатыттан минньигэс туорт бэлэх уунна.

Икки чаас биллибэккэ ааһан, ийэлэр, көрөөччүлэр дуоһуйа астыннылар. Түмүккэ анааран көрүү буолла. Михаил Сивцев бу күрэх былырыын нэһилиэк түөлбэлэригэр ыытыллыбытын, быйыл улуустааҕы күрэх тэрээһиннээхтик ааспытын этэн туран, кыттааччылартан киирбит этиилэри, көрүүлэри ылынан, инникитин өссө интэриэһинэй, аныгылыы көрүүлээх тэрээһиннэр ыытыллыахтара диэн эрэннэрдэ.

Ийэлэргэ анаан ыытыллыбыт улуустааҕы «Мамабатл» күрэх үрдүк таһымнаахтык ыытыллыбытынан «Сайдыы» СК коллективыгар, «Далбар» дьахтар сүбэтигэр уонна бу киэһэни киэргэппит улууспут кэрэ аҥаардарын хамаандаларыгар махтанабыт.