Бүгүн «Нам улууһа» МТ дьаһалтатын 2024 сыллааҕы үлэтин отчуоттуур Анатолий Павлов салайааччылаах 2-с бөлөҕө Арбын нэһилиэнньэтигэр отчуоттаата.
Отчуокка Ил Түмэн председателэ Алексей Еремеев, Ил Түмэн тыа хаһаайыстыбатыгар уонна аграрнай политикаҕа сис комитетын председателэ Александр Атласов кыттыыны ылан ситэрэн-хоторон, билиҥҥи балаһыанньаны быһааран биэрдилэр.
Халаан уутун кэмигэр үлэлээбит, содулу, саахалы туоратыыга кыттыспыт олохтоохторго «За вклад в предупреждении и ликвидации ЧС » бэлиэни, махтал суруктары туттардылар. Дьиэ кэргэн институтун бөҕөргөтүүгэ уонна сайыннарыыга көхтөөх дьиэ кэргэттэр махтал суругунан бэлиэтэннилэр.
Видеонан отчуот кэнниттэн ааспыт сыллааҕы туруорсуулартан туох туолбутун, туолбатаҕын ырытыы буолла. Ол курдук, халаан кэмигэр кырдьаҕастары уонна доруобуйаларынан хааччахтаах дьону Намҥа интернат-дьиэҕэ быстах кэмҥэ олордору туруорсубуттар. Онон 4 киһи быстах кэмҥэ олорбут. Арбын Көбөкөн икки ардынааҕы суол өрөмүөнүн туруорсубуттара үлэ саҕаламмыт, Хатыыстаахха саҥа муоста оҥоһуллубут. Саас муостаны харыстыырга анаан мууһу тутар тэрил туруоруллуоҕа диэн эттилэр. Нэһилиэк иһинээҕи суоллар быстах сирдэринэн оҥоһуллубуттар.
Тыа хаһаайыстыбатын салаатыгар балай эмэ ыйытыы киирдэ. Ол курдук, саҥа механизм киириитин, хотон тутуутун, кооператив үлэһиттэрин хамнастарыгар толуйууну, үүт туттарыы хаччытын, ынахха, биэҕэ көрүллэр субсидияны ыйыттылар. СВО кыттыылаахтара тыа хаһаайыстыбатынан дьарыктаналларыгар анаан Россияҕа киирбит «Агромотиватор» гранд туһунан сурастылар.
Халаан уутуттан эмсэҕэлээбит дьиэлээх дьон көмө харчытын ылыыга өйдөммөт балаһыанньа баар диэн ыйытыы биэрдилэр. Онно балаһыанньа быһыытынан биир эрэ дьиэлээх буоллахтарына көмө бэриллэр диэн чопчулаан биэрдилэр.
Биэнсийэлээхтэр уонна биир кэлим босуобуйаҕа, үөрэх салаатыгар экзамеҥҥа сыһыаннаах ыйытыылар киирдилэр. Олох сайдарынан «Цифровой рубль» киириитин туһунан сурастылар.
Нэһилиэккэ ФАП тутуутун түргэтэтэри туруорустулар.
«Нам улууһа» МТ ааспыт 2024 сыллаах үлэтин 34 киһи иһиттэ. Улууспутугар үгүс үлэ ыытылларын бэлиэтээн туран биһирииллэрин биллэрдилэр.
Семен Аргунов